成交薄弱仍未見長線資金入場
5月24日，大致多雲，有幾陣驟雨，初時兩勢較頻密及有幾陣雷雨。都預咗美國債務上限談判無咁快解決，喺6月1日死線之前，兩黨都唔會有任何讓步，談判膠著，美股隔晚由升轉跌。道指跌231點；標指跌47點；納指跌160點。呢段時間美股主要靠幾大科技股支撐，FAAMG隔晚早段連環再發放好消息，亦難再撐起股價，午後因為債務上限談判未有結果，加速美股跌勢。
雖然標指已升穿1月高位，但市寛未見有改善，創52周高股份較1月份時少，反映升勢僅集中於幾隻重磅科技龍頭上，其他股份升幅有限。零售股表現更加麻麻，龍頭Nike未能升破1月高位，本月見過129元後，現價已回落至109元，更創5個月以嚟低位。
自3月美國爆發銀行危機後，大量美元存款流向貨幣基金，銀行缺水逼住收緊信貸，坊間流動性開始變為較緊絀。稍後提高債務上限後，財政部將加快發債，未來幾個月市場游資會被發債抽走，屆時市場流動性更為不足，對於資金本來已短缺嘅地方銀行非好事。若然銀行未能發揮借貸功能，未能向中小企提供融資，一旦出現流動性問題，美股就有機會出現較大調整壓力。
港股日升日跌嘅情況，係因為中概股正正係咁行，不過周一中概升咗幾多，周二中概就回返晒，今日港股睇怕都要再向下，不過19000-19200會有一定支持。快手(01024)業績前炒上，又係用返騰訊(00700)同阿里(09988)同一招，有博業績嘅，今日預咗大市要向下，睇嚟見好要收，有食好食。只要望住騰訊跟巴巴業績之後表現，都應該食咗先。噚日大市成交只有863億元，又係靠北水支持，內地股市顯著向下，外資淨沽出，中外資繼續你買我沽，暫時中港股市仍然未見起色。尤其喺成交淡薄下，未有資金入場大手買貨，即使長線資金入場買貨，都會用時間慢慢收集，基金買貨從來唔急，更會愈買愈低，既然如此，我哋一介散戶又何必急住入場做先鋒部隊。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。