抽中快手唔急走 惜貨如金要持有
2月4日，天晴乾燥，今日暖返啲，嚟緊幾日日間氣溫保持廿幾度，甚單止暖，出猛太陽仲有啲熱。美國就業數據向好，即係新一輪刺激方案計劃唔使太急推出。美股隔晚個別發展，道指跟標指微升，納指則微跌。就業數據有驚喜，而美國經濟復甦速度，取決於美國疫情發展，雖然啱啱嘅就業數據表現唔錯，但唔等於刺激經濟方案再無需要。
至於港股有啲腳軟，隔晚夜期跟ADR回軟，估計今日港股或再失守10日(29167)及20日(28971)線，呢樣亦係古天后意料中事。由於北水下周將收爐，港股呢幾日偏軟亦正常，估計呢段時間都係喺10日及20日線附近上落，移動區間大約係28500至29500點之間。
相信今日大家最關心嘅，並唔係市場嘅上落，而係快手(1024)嘅中籤結果，快手IPO超額約1203倍，一手(100股) 中籤率只有4%，B組認購500手先穩獲1手，認購2,000手才穩獲3手。有225個申請出資逾5.2億元抽4.56萬手，亦僅能獲得14手。呢個中籤率睇到眼都突埋，一手難求，若然以抽獎心態抽一手中一手，真係要劏雞還神。快手一手難求，難怪未上市已見有OTC交易價去到250元，仲成交咗5萬股，較招股價115元升1.17倍，若然咁好彩中獎，真係要惜貨如金咪亂咁沽。
由於快手未有同類股份於其他市場上市，加上其市值及交投量，預計快手上市後，將以快速納入機制被納入多個指數，亦合符資格被妠入港股通，相信會成為北水新寵兒。只係快手登場後，北水就收爐，IPO抽唔中嘅亦唔使太灰，明日上市後，股價高開一倍的話，唔排除會有心急人趕住沽貨過年，下周或有機會喺200元邊搵到位入場。
至於今日登陸魚缸另一新丁心通醫療(02160)雖然同獲熱捧，但由於市面上已有同類股份選擇，其受歡迎程度遠不及快手，當然IPO抽中都係穩賺，但古天后認為心通有貨可以食糊，幾時都係有糊唔食，罪大惡極。而心通唔似快手屬稀缺性類股份，亦唔建議喺上市首日追貨，有心想買都睇定少少。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。