拜登上場中美關係暫可鬆一口氣
拜登上場中美關係暫可鬆一口氣
1月19日，天晴乾燥，早晚溫差較大，不過日間有陽光又唔係幾覺凍。隔晚美股假期休市，夜期承接日間升勢，表現唔錯，逼近29000大關，睇嚟要升破29000難度不大。話就話市場對於明拜登就職典禮，有否突發事情仍有所顧忌，但係侵侵離開白宮，令過去四年侵侵唔按理出牌嘅日子嘅終可告一段落。市場一般預期喺拜登上任後，首要任務係處理好疫情，同時要谷返起美國經濟，單係呢兩項內部事務都搞到一頭煙，應該無乜時間處理對外事務，換句話講過去一直繃緊嘅中美關係，應該可以有一段蜜月期，並為中美港三地股市提供一個利好環境。
自踏入1月開局以嚟，港股都以大漲小回方式向上推進，順利突破28000後未見回頭，已反映市場對拜登上任總統後嘅股市投下信心一票，又或者係市場認為美國對中資企業嘅制裁行動或已告一段落，近日亦見有資金開始買入曾被制裁嘅股份。好似上周五被美國國防部列入實體名單嘅小米(01810)，周五急跌一成後，喺29元樓下已見買盤掃貨，其中又以北水掃貨最積極，小米亦喺50日線搵到支持。除咗制裁股鬆一口氣，其他多個具有概念，及得到國策支持嘅板塊，亦繼續喺資金輪流板塊輪動下，行三步褪一步咁邊抖邊上。
噚日內地公布多項去年全年經濟數據，喺疫情下多個數據仍維持增長，並能優於市場預期，反映內地經濟力已從疫情中恢復，由工業生產步向需求轉移，供需平衡亦明顯有改善。去年第四季度經濟增速較第三季度提高1.6%，其中工業、消費分別按季提高1.3個百分點及3.7個百分點，服務業生產指數按年增7.7%，按季加快3.4個百分點，顯示疫情穩定後服務業快速恢復。
而全年工業生產及出口均好過預期，兩者分別增長2.8%及4%。而整體經濟上去年第四季增長回升至6.5%，唔單止超過2019年同期水準，亦超過潛在經濟增速水準。不過消費動力仍灰不足，上月社會消費品零售總額4.05萬億元人仔，按年增長4.6%，增速較前一個月回落0.4個百分點。特別一提係餐飲收入上月只輕微增長0.4%，呢個亦係最近餐飲股見頂回落嘅原因。由於消費表現未如理想，估計內地將加快促進消費提振內需，唔排除再有政策扶持谷內需以刺激復甦。喺內地經濟向好嘅情況下，經濟增長預期可於今年迅速回復，成為推動中港股市向上嘅催化劑。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。