接近二萬水平為港股建倉理想切入點
2月22日，天晴乾燥，早晚較清涼，日夜溫差較大。隔晚美股表現疲弱，主要係10年美債息升至3.96%，意味住下月加息幅度或者唔係0.25%而係0.5%，加息憂慮引發市場不安，悲觀情緒帶動下，三大指數齊齊跌逾2%，標普跌穿4100首個支持後，正邁向下一支持3900。由於CPI及PPI嘅回落速度不似預期，加上美國雖不至陷入衰退，但有機會呈向橫向發展，咁喺現水平嘅美股，經過兩三個月反彈後，自然值博率大減，入場資金亦減少。另上標指升至4100-4300水平開始見阻力，而之前回補空嘅買盤亦完成，自然美股回吐壓力增加，不過美股暫時又唔見得會出現急跌，標指跌至3900水平，應該有一定支持。
自11月美股帶領全球股市反彈，市場一直憧憬通脹回落，息率回落，甚至期望今年減息。不過喺中國開關後，資源價格已逐步回升，如此一來，通脹無乜可能大幅回落，美國嘅核心PCE要回落至聯儲局期望水平2%，機會都好低。所以對於今年下半年減息，古天后一直抱懷疑態度，目前睇嚟今年放緩加息已經要開香檳。
至於港股呢邊，噚日大笨象(00005)派成績表，業績係好過預期少少，但午後其股價係先升後回，但至ADR時段升破60元水平，其實呢個先應該係反映噚日季績嘅價格，今日預期大笨象都會上60元水平。不過呢啲水平嘅大笨象，唔單止已反映其優於預期嘅季績，亦反映埋派息預期，所以呢啲位亦唔建議再追貨。
2月份港股一直處於回調浪之中，嚟到現水平，已接近回補1月初20200嘅另一個上升裂口，估計喺回補呢個裂口後，頂多考驗埋250日線，即20080左右，而20000呢個心理關口，料有不俗支持。雖然暫未見港股再有新資金流入，難支持港股出現較大升幅，但下月兩會舉行在即，加上2月調整幅度已足夠，喺現水平開始買貨，具有一定防守性，若然要建立港股倉位，現水平應該係一個唔錯嘅切入點。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。