提早收爐 虎年再戰
1月28日，大致多雲，初時有薄霧，間中有雨。市場需要時間去消化鮑爺嘅鷹派言論，加上美國上季經濟增長好過預期，令加息預期繼續升溫，美股隔晚先升後回。道指早段曾反彈逾600點，但至中段沽壓再現，三大指數最終倒跌收市，道指跌7點；標指跌23點；納指繼續跑輸，跌189點。
美國經濟數據表現強勁，有預測指3月加息或取進地加0.5厘，確係嚇窒美股缸邊友，資金一見反彈即減持，令美股喺甚為超賣嘅情況下，仍然彈唔起。不過金融服務機構Comerica預期，當市場消化聯儲局會議決策後，市場利率及股市將回穩，由於股市呈「超賣」，睇好周期性價值型股，包括有盈利嘅能源、金融、工業及原材料等企業等投資價值。鑑於整體企業盈利增長料介乎8至10%，標指年底仍可上衝5000點關口。
一向受市場注目嘅Tesla公布業績，收入跟純利跟好過預期，但因為供應鏈戰將限制公司增長，而呢個障礙今年持續。公司CEO馬斯克表示，因今年晶片將持續短缺，故年內不會推出新款電動車，轉而專注研發引擎及車用工具。公司強調全自動駕駛系統(FSD)仍係其中一個主要目標，料其產生嘅相關收入，將推動公司整體收入，不過其股價全日跌11.55%，收報829.1美元，失守850重要支持。作為全球電動車股龍頭，Tesla面對嘅問題，其他車企同樣要面對，喺供應鏈挑戰下，車企今年上半年仍然難捱。
至於港股呢邊，今日期指結算，嚟緊周一只有半日市，跟住就放三日農曆年假，喺長假之前，相信資金都唔多願意入市，更有資金繼續減磅離場，睇嚟港股都係偏軟居多。不過噚日臨收市前嗰大半個鐘，恒指由低位23600水平一下抽升至23800水平之上，唔排除短線底見咗，只係長假窒礙入市意欲，暫時港股可能喺23500至24000之間窄幅上落，反正長假將至，不如提早收爐，待虎年再戰。
P.S. 下周一半日市，本專欄暫停一日，初四即下周五回歸
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。