提防美國加大制華力度 國際地緣政治風險升溫
4月30日，天晴，日間炎熱，奇怪係呢排一早一晚又唔算好熱，跟午間氣溫30度有啲距離。拜登入主白宮100日，美國抗疫工作見成效，大量國民已接種疫苖，加上大開水喉刺激經濟，美股自去上任以來，表現排名第二最好，估計侵侵呢位史上最注重美股走勢嘅前任總統，心裡應該不是味兒。隔晚美股表現理想，道指再升239點，企穩34000水平；標指則創收市新高，納指再升31點。
至於港股終見突破，成功企穩50日線以上，雖然成交額唔配合，但少咗北水助力，指數仍見突破，只要今日繼續穩守50日線，踏入5月繼續向好機會較大。不過29500至30000點阻力重重，而喺年初受捧嘅科技股及高估值股份，仍然較高位有一段距離，唔少高追嘅缸邊友而又無執行止蝕嘅話，完全感受唔到近日港股穩步上揚嘅狀況。
睇返自今年初以嚟，恒指其實都有二千點進帳，睇返十大升幅藍籌股，幾乎全屬傳統股份。而科技股榜上無名，主要係內地反壟斷監管下，呢批股份備受困擾。不過市場已某程度上消化咗反壟斷監管嘅負面消息，尤其係各大科企嘅罰單將陸續開出，繼阿里(09988)被罰逾180億元後，市場估計美團(03690)約被罰40多億元，而噚日再有消息傳出，一向以乖孩子形象視人嘅騰訊(00700)，亦將被罰約100億元人仔，相對阿里有關當局對騰訊懲罰已算輕手。有消息指內地監管方嘅態度係，騰訊並非如阿里一樣屬重點懲治對象，但監管行動展開，騰訊作為內地科企領頭羊，以前收購及投資唔多唔少都未完全按正常程序進行反壟斷審批，唔處罰佢係完全無可能。只係騰訊都算循規蹈矩，係咁矣罰下，免得被指阿爺大細超。雖然來自反壟斷嘅壓力減少，但呢個板塊能否回復升勢，仲要睇返行業嘅整改力度及進度，以及內地股市氣氛如何。
除咗科網巨企能否回復活力，將影響港股後市表現，中美關亦係決定港股後市走勢嘅關鍵。本來拜登上場，市場憧憬佢跟中國嘅老朋友關係，中美兩國關係可回復到侵侵任期前嘅甜蜜時光，可惜拜登政府似乎沿用侵侵對華強硬手段，有所不同嘅係拜登跟其他盟友修好聯制華，而新疆棉花事件及《中歐投資協定》受阻，皆顯示盟國願意喺戰線上與美國保持一致。
而美國抗疫已見成效，美國經濟復甦力度加快，跟中、俄角力本錢大有提升條件，若然美俄關係成功修補，中國只會進一步被獨立，美國加大制華力度亦唔出奇。屆時香港必成磨心，港股想有運行都難。雖然古天后唔多信五窮六絕呢啲傳統講法，但國際地緣政治風險變得更緊張時，入場要有心理準備，加倍留神。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。