摸底博反彈往往得不償失
1月8日，大致多雲，氣溫急降，又氣寒冷，日間部份時間有陽光及極度乾燥，寒冷天氣於周末期間持續。美國新一屆政府終塵埃落定，侵侵雖然死口唔認敗選，但都承諾會配合華府交接工作，帶動美股三大指數做好再創新高，道指升211點或0.69%，算係跑輸，標指升1.48或55點；納指最勁，升326點，升幅達2.56%。
拜登上場加上民主黨控制國會兩議院，有助順利推動刺激方案措施，由於疫情仍然嚴峻，加碼派糖刺激經濟已無懸念。雖然拜登於競選期間已揚言當選後將加稅，但市場相信加稅嘅負面影響可被基建開支增加而抵銷，加上市場焦點放咗喺政府順利過渡，對國會發生暴動似乎無動於衷。
不過，美股估值高昂已係不爭事實，加上全球去美元化趨勢已成，美匯指數正處於完美下降軌中持續下行，而多國政府不斷減持美債，減少美元資產總有一日減到去美股，熱衷於炒美股嘅缸邊友，不得不提防。幸而喺去美元化嘅同時，資金反而流入新興市場，雖然港股屬美元資產區，但港股目前以中資股為主，喺中概股持續回流，以及資金流入新興市場下，港股仍然係受資金歡迎。
侵侵正倒數留喺白宮嘅日子，但未有對打壓中資企業有所放鬆，據外電報道，美國政府擬進一步收緊投資禁令，計劃要求美國人及企業沽清被指與解放軍有關嘅中資股，限期維持於今年11月11日前。幾隻中資電訊股面臨下周於紐交所除牌，早兩日紐交所話除又唔除，令股價急彈咗一兩日，當時古天后已呼籲仲有貨嘅苦主，好趁反彈把握跳車逃生機會，呢兩日又回復跌勢。唔少缸邊友成日吼住幾隻中資電訊股博反彈，雖然間中係會有反彈嘅日子，但大趨勢呢個板塊弱過藥煲，唔明白點解要取難不取易，有強勢股唔跟，係要博弱勢股見底。從來估頂摸底唔容易，估頂早咗沽貨食糊，最多都係贏少咗，摸底博反彈往往係得不償失。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。