放寛入境亦無助港股大反彈
9月26日，大致天晴，日間天氣炎熱乾燥。美股上周跌勢顯著，道指周五再跌486點；標指跟納指分別跌64點及198點；總括一星期，道指跟標指跌逾4%，納指更跌逾半成。港股ADR跟黑期均見下跌，睇嚟今日港股又要低開。道指已率先跌穿6月底部，標指跟納指同樣回試6月低位。美股上月反彈，令唔淡友被挾至懷疑人生，但古天后已多次強調為熊市中反彈，唔使開心得咁早，而美股暫時亦難言見底。尤其係美債出現倒掛後，美股通常會見殂回落，以過往熊市經驗，美股至少都要10月之後先有機會見底。
市場憂慮經濟衰退，油價上周累跌超過7%，跌穿80美元，繼續一浪低於一浪向下尋底，睇嚟好快要下試70美元水平。喺烏局勢影響下，全球原油供應緊張，油價竟然拾級而下，可見投資者睇法幾咁悲觀。雖然油價急挫，但美匯指數續升，歐元兌美元跌至0.98，為20年嚟低位.。英國大幅減稅，英鎊亦仆直，跌至37年新低。英倫銀行睇性嚟緊要加息穩住英鎊。全球加息令信貸成本上升，全球已再無咁多平錢流動，資金流向美元，但美股喺受惠美元流入下仍要下跌，其他地區嘅股市仲要面對資金流出，壓力更大。
人民幣唔覺唔覺近日已跌逾一成，過去十年受惠歐美資金流入，中國企業已習慣借貸渡日，但今年開始資金由淨流入變成淨流出，人行喺目前情況下，亦未能大手鬆開銀根救經濟，中國企業市面對信貸緊迫，一旦處理不當，後果將十分嚴重。
港股失守3月低位18235，3月見此水平，成交達到3000億元，但今次當港股跌穿19000水平，成交維持低迷，反映之前3月買貨嘅資金，早於大市反彈至22000水平時安全逃生套現，所以目前已無護盤必要。喺再無新資金流入下，成交額持續萎縮，陰乾穿底令港股一厥不振。市場未見有新資金流入，而幾隻重磅藍籌一直有大股東減持威脅，咁嘅氛圍下，港股唔知靠乜嘢本事翻身。
雖然上周港府宣布略為放寛入境措施至0+3，但呢個舉措能否吸引旅客訪港，你知我知單眼佬都知，所謂嘅好消息未能刺激港股重返18000大關，反而消息宣布後再跌贈興，喺全球股市疲弱下，港股亦無例外，18000隨時由上周支持位，變成本周阻力。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。