政府派錢唔執好蝕底
6月2日，多雲，間中有幾陣驟雨及局部地區雷暴，日間短暫時間有陽光。美股隔晚過完長周末個別發展，道指升45點；標指跟納指則分別跌2點及12點。散戶網民繼續熱炒抱團股，AMC股價再升逾兩成；公司宣布向投資公司Mudrick Capital配售850萬股新股，集資用於收購戲院資產，並且削減債務桿；另一隻受網民歡迎嘅抱團股GameStop亦升12.3%。電動車股亦見資金追捧，港股呢邊嘅比亞迪(01211)、吉利(00175)跟長汽(02333)應該又落鑊。
美股暫時仍向好，華爾街大好友唱好，雖然防疫措施放鬆後，或出現消費狂潮，或導玫通脹急升，不過，美國經濟在「V型復甦」過後，目前實際上已回到了疫情前的水平，有能力應對通脹壓力。即使10年期美債孳息喺今年內有機會重返2厘水平，都只不過係回復正常，只要循序漸進地上升，市場應該可以接受。而科技股經過一輪調整後，市場熱度亦有所下降。
至於港股6月開局表現唔錯，尤其一眾新經濟股表現醒神，若然後市恒指要進一步向上挑戰30000大關，頭五隻指數重磅股，新經濟股ATM已佔三隻，即係騰訊(00700)、美團(03690)跟阿里(09988)定要生生性性，再加埋另多兩隻傳統股大笨象(0005)跟友邦(01299)要齊齊發力，恒指先有重上30000嘅可能。
通脹威脅殺到，政府第8批最多200億元通脹掛鈎債券(iBond)正接受認購，基本上係零風險穩賺2厘息，反正放喺銀行得嗰一個幾毫，接近零息，抽ibond有機會兩個星期賺返一千幾百，既然政府曲線派錢，唔抽真係好蝕底，反正人人有份，點都分到一手。
iBond最低面額是1萬港元，年期3年，投資者可以揸到期滿，亦可經二手市場沽售，睇返舊年嘅第七批ibond(04239)，當時獲45.6萬人認購，約23萬人獲分配上限4手，另有約22.5萬人獲發3手或以下，上市以來價格最高見過104.95元；而若果首掛日走人，當日收報102.9元，成功認購上市即沽即時賺咗餐飯，揸到今日帳面贏緊290元，點計呢條數都好過擺喺銀行多多聲。由於iBond嘅分配機制，係「循環分派」，即先確保人人有一定份額，再將剩餘嘅手數以循環方式分發予認購一定手數或以上嘅人，直至手數不足以再進行下一個循環，再按抽籤形成分發餘下手數。換句話講，總動員屋企合資格嘅人，唔使孖展認購，確保人人有份，以一家四口計，人人中一手，咁就有機會執返兩千銀，食番餐好唔成問題。ibond6月11日截止認購，6月23日有暗盤交易，6月24日上市，當一家四口每人抽四手，雖然要用十幾萬，但兩個星期左右執二千幾，咁都好過無啦。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。