政策及消費旺季利好內需股
12月14日，多雲，早段天色晴朗但午後開始有一兩陣雨，雨後氣溫急降，未來幾日繼續清涼，氣溫保持20度以下。上周五美股觀望國會就新一輪紓困方案談判進展，三大指數個別發展，道指企穩30000點之上，升47點；標指跟納指則分別跌3點及27點。逾9000億美元刺激經濟方案料可獲國會通過，通脹預期升溫，刺激國際金價上周五回升，不過升幅有限，暫時對金價唔好抱有太大期望。而今個星期美國聯儲局及英倫銀行將進行議息會議，預期將維持寬鬆貨幣政策，而疫苗開始應用，市場憧憬經濟前景轉趨樂觀。
至於港股仍缺乏明確方向，除咗暫時未見有新嘅利好消息刺激外，逼近聖誕節長假令缸邊友入市態度轉趨審慎，未有積極入市。雖然拜登入主白宮已無懸念，美國政治不穩定因素已明朗化，而疫苗推出市場廣泛應用；兩大利好因素帶動大市向上，不過兩大利好因素仍未能完全確定。拜登入主白宮對中國政策如何仍屬未知數，而疫苗成效更難預測。暫時恒指仍於26000至27000之間上落，向上或向下皆未見突破。古天后都係嗰句，衡量自己倉位，若然手持股份在本周見有升勢，應減磅套現獲利，炒股唔炒市情況持續。
雖然上周五港股ADR表現麻麻，幾乎全線向下，不過今日港股未必跟隨，主要係好淡消息交替，港股將持續拉鋸局面。不過近日已不斷有分析指新興市場來年有望跑贏美股，而當中古天后較睇好內需股板塊。由於中央日前再提到「需求供給側改革」，加上傳統消費旺季將至，受惠大型品牌內需股受惠消費升級，以及政策利好，內需股可睇高一線。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。