政策風險令科網股極不明朗
7月6日，大致多雲，短暫時間有陽光，同時有幾陣狂風驟雨，一號戒備訊號現正懸掛。隔晚美股假期，不過港股表現認真麻麻，主要係阿爺出招懲戒滴滴出行，勒令滴滴出行app下架。由於內地對科網企業監管升級，令港股相關科網股被北水掟貨，拖累港股噚日一度跌267點，最終恒指收市跌166點，報收28143點，連跌5個交易日；恒科指更跑輸大市，跌180點，跌幅逾2%。當中滴滴出行大股東之一嘅騰訊(00700) 股價及相關新聞 被北水狂掟貨近75億元，破晒紀錄。
有指阿爺今次嚴懲滴滴出行，主要係不滿其先斬後奏，未有聽隨阿爺意見，擇後赴美上市計劃，而赴美上市或令內地龐大數據外流，導致中國國家及公民數據安全有不可控風險，屬於「違背國家安全」。監管當局並非只針對滴滴，近年已曾多次透過「窗口指導」方式，引導已經喺美股掛牌或有赴美上市想法嘅企業，回流內地或香港上市。
其實中美角力已久，自拜登上場後，兩國關係非但未見緩和，反而鬥爭更趨白熱化。市傳喺滴滴出行赴美上市前，中國監管部門高層曾與滴滴多次溝通，唔希望該公司赴美上市，惟滴滴最終選擇「先斬後奏」，完全唔畀面阿爺，引發當局不滿，有傳今次懲治滴滴嘅力度恐遠超阿里巴巴(09988) 股價及相關新聞 。單單係滴滴上市幾日，旗下叫車app即遭勒令下架，仲大鑊過螞蟻未上市前被刹停，難怪有外媒表示，阿爺擺明割美國韮菜。阿爺除咗嚴懲滴滴之外，另有兩間喺美國上市嘅平台企業同遭審查，滿幫集團(美股︰YMM)旗下貨車配對App「運滿滿」及「貨車幫」，以及看準網(美股︰BZ)嘅招聘平台「BOSS直聘」，均須停止新用戶註冊！
中國政府近年對數據安全重視程度顯著提升，更希望將數據控制權穩固地握喺手中。近期被監管打壓嘅企業，都是掌握大量消費者數據，可利用數據壟斷市場嘅大型平台企業。阿爺要阻止呢啲企業利用大數據「殺熟」等反競爭行為，政府有必要擔當重要角色，負責管理數據及監察其用途。估計今晚美股假期過後，滴滴等相關企業以致大部份中概股，應該跌到一仆一碌，對港股上市嘅科網股亦會構成負面影響，喺情況極唔明朗下，暫時都係忍忍手，寧願等事情明朗化再作定奪，暫時未係撈底時候。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。