政策風險影響下 不能獨攬新經濟股
4月15日，多雲，有幾陣雨，氣溫稍降，最高只有24度，明日雨勢更為頻密。美股收市個別發展，納指威咗一晚，噚晚回吐，跌咗138點；道指跟標指則創新高後回落，前者收市仍升53點；後者則倒跌16點。美股季度財報又開始，大型銀行業績超出預期，有分析指美股今年第一季度嘅企業盈利增長按年超過三成，係2008年金融海嘯以嚟最大季度增幅。
噚日古天后提到，內地基金第二季度集資情況未如理想，截至4月7日止一周，中國股票基金的累計資金淨流入僅297.8億美元。相反，美股基金資金流入回復正增長，截至今年4月7日止一周累計資金淨流入已達到1700億美元。反映投資者目前對美股基金興趣遠超內地股票基金。事實上，近日美股跟內地股市走勢正反映實際情況。
睇返港股近日情況亦差不多，大市日均成交金額持續縮水，繼續咁搞落去，真係唔慌有運行。不過噚日有內媒報道，字節跳動啟動來港上市計劃，估值預期接近4000億美元，折合均3.1萬億港元，規模超高於上季最受歡迎嘅新股快手(01024)，屬於重量級中科企。若然消息屬實，或吸引資金流入認購，有望解決港股缺水問題，並為科技股注入活力，因為其估值可為提振其他科技股，咁第二季港股或有望扭轉目前頽勢。
新股市場氣氛改善，為扭轉港股頽勢其中一個條件，若字節跳動來港上市能扭轉新股近日淡風，吸引資金再流入港股，或能帶嚟轉機。只不過阿里巴巴(09988)涉壟斷被重罰後，市場正猜測下一個被阿爺盯上嘅目標，而字節跳動為內地短視頻龍頭，會否因為反壟斷被盯緊，影響其上市計劃仍屬未知數。目前港股仍處於上落市格局，而資金仍偏好炒作受惠經濟復甦嘅傳統股，過往科技股升勢如坐火箭嘅日子已不復再，一面倒瞓身新經濟股已不合時宜，喺政策風險及資金取向下，投資者需於新舊經濟股取得平衡，是以近日古天后亦有推介舊經濟股如新創建(00659)及馬鋼(00323)等，順勢而行，方能運轉乾坤。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。