散戶未能克服止蝕障礙 永遠成為市場輸家
6月3日，部份時間有陽光，初時有一兩陣驟雨，日間天氣酷熱。美股隔晚雖然反覆，但三大指數仍錄得升幅。散戶網民繼續熱炒抱團股，AMC向基金Mudrick Capital配股後，即時掟貨，散戶照單全收接貨。Mudrick Capital接貨即日沽出套利逾4000美元，但網民則發起繼續買入並持有AMC的股票及認購期權，推高股價以迫使莊家(market maker)買入更多股票作對沖，從而令股價繼續揚升，AMC股價急升近倍。而呢個星期美股焦點將會係周五嘅就業數據，投資者關注通脹壓力會否促使聯儲提早加息。不過聯儲局宫員堅持通脹僅屬短期現象，聯儲維持超寬鬆貨幣政策，更有預測指聯儲局要到2024年以後先開始加息。
五窮月不窮，6月開局似乎預視六絕月亦不該絕，不過預計6月亦好難順風順水，暫時仍然係一個上落市格局，只係恒指移動區間略為上移去到28500至29500點，除非成交顯著回升配合，恒指能突破29500點衝上三萬大關，否則都係不宜太過進取。
幾年前古天后已經講過，隨住更多內地資金流入港股，港股話語權早由外資變成中資主導。中資喺港股影響力日益上漲，尤其中資股已由內地資金揸莊，港股表現更愈趨A股化，而港股玩法亦已跟過往大大不同。北水出手之快，以及流入量之大，大家喺年初已見識過，快嚟快去相對外資過往傾向中長投資，北水則偏好短炒，亦鮮有對估值基本因素等太過執著，北水炒股主要以資金及市場情緒作主導，一旦北水對某股熱情冷卻，其下跌速度可以相當驚人。
另一點要注意係北水炒股完全緊貼內地政策，由政策而非由市場主導，連大戶亦唔敢向挑機阿爺政策，只有順勢而行，平台股呢兩個月嘅表現，足以反映內地資金對政策嘅敏感度，遠比外資高。喺港股愈趨A股化下，港股變得更快嚟快去，要追上呢個潮流，多作短線操作，相對坐定定等食似乎更具勝算。
不過散戶有一個缺點，經常犯咗短炒變長揸嘅壞習慣，尤其當買入嘅股份走勢已逆轉，往往克服唔到要嚴守止蝕嘅心理障礙，結果愈輸愈多，除咗浪費資金、時間及機會成本外，炒股信心遭受嚴重打擊，呢個係最大問題。所以炒股要適時靈活變通，犯咗嘅錯要盡快糾正，與其日日埋怨點解輸，倒不如向前望，搵返一個切合刻下市況嘅炒法，咁先係可以長久喺股市嘅生存之道，否則只會永遠係市場嘅輸家。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。