散戶貪免費資訊 終淪為大戶點心
6月11日，短暫時間有陽光，有幾陣驟雨，天氣炎熱。美國通脹數字終於出爐，美國5月通脹近13年最勁，不過就業市場續改善，投資者對經濟前景感樂觀。即使愈來愈多聲音警告通脹重臨，並質疑聯儲局可能比市場預期更早收水，然而喺就業市場改善，經濟復甦嘅大前題下，市場仍然相信可支撐較高估值嘅股市。
值得留意係評級機構穆迪數據顯示，去年美國非金融業現金持有量暴增32%至破紀錄嘅2.15萬億美元(約16.77萬億美元)，總額較2007年增加兩倍；隨住企業信心提高，預料會在喺資本投資、派息、購併及股票回購上投入更多資金。而大持有最多現金嘅企業包括蘋果公司(Apple Inc.)、微軟、亞馬遜和Facebook。按行業計，科技業持有最多現金，達8880億美元，佔總數41%，之後係零售、醫療與製藥，以及製造業。單係呢筆天文數字嘅現金，一旦投入市場，美股始終易升難跌。
至於港股近個幾星期，尤其喺上月底期指結算後，悶局持續，港股升升跌跌，仍未見明顯方向，恒指仍然喺28500至29300點幾百點之間上落。不過個別板塊輪流炒作，短線操作增加，而短線走勢通常由市場情緒主導，喺整體市場未有大方向下，隨波逐流可能係呢段時間喺市場嘅生存之道。
不過短炒都唔係全部股份可以買得落手，對於古天后嚟講，市值太易，容易被人為操控，以及八字頭創板股，可以話係禁地。呢類股仔炒起上嚟，可以45度角狂升，主要係人為操控，升到咁上下，最終條路都係散戶畀莊家割韭菜。噚日又有股仔急挫逾八成，而呢隻創板股係同飲食界名人「幟哥」黃永幟有關嘅龍皇集團(08493)，公司早前公司通過股份10合1，臨時交易編號為(08556)。
而龍皇暴跌惹人注意，主要係呢隻股係近日唔少炒股群組向散戶推介嘅熱炒股，咁啱得咁橋「幟哥」減持套現逾8000萬後，股價就插水笨豬跳，時間上嘅巧合，睇嚟定必引來監管機構查問。而炒股群組透過「微信女」散戶，亦唔係乜嘢新鮮事，偏偏每次都總有人中招，講到底都係貪之過。
雖然監管當局已就一單「微信女」個案執法，而同時證監會亦有加強投資者教育，但總有人因為貪念而甘願加入免費炒股社交平台，又對群組內嘅訊息深信不疑，最終又畀莊家割韭菜。緊記世上並無免費午餐，古天后多次強調，炒股要用嘅器官係眼睛同腦袋，而並非單靠耳仔，以為收到獨家猛料，可以一夜致富，若然繼續唔肯用功，唔作獨立思考做分析，只會淪為大戶點心。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。