新世界樓盤受影響買家執返身彩
7月9日，天晴，日間天氣酷熱，未來幾日都係熱到飛起。美股債息急跌，反映市場避險情緒升溫，隔晚美股受壓，標指跟納指由紀錄高位回落，分別跌37點及105點；道指盤中曾跌500點，收市幅收窄至259點。聯儲局會議紀錄收鴿放鷹，資金湧入債市避險，美國10年期國債孳息率曾跌7.3個點子，低見1.246厘，跌至2月以來低位。不過華爾街好友大有人在，瑞信首席美股策略師Jonathan Golub仍為目前經濟需求仍旺盛，因為供應短缺嘅同時，投資者手頭現金鬆動，市場唔會認為債息變化，而捨棄價值投資。
美股高處不勝寒，但三大指數屢創新高，就算喺現水平出現大幅度調整，參與嘅缸邊友仍然獲利豐厚，上半年大豐收，下半年獲利回吐亦無所謂。相反港股喺年初見咗高位之後，表現麻麻，上半年一直喺大型長方型反覆上落，但嚟到下半年開局，就變成反覆向下，7月咁多個交易日都反覆向下尋底，噚日恒指更急挫逾800點，跌穿呢幾個月以嚟嘅區間底部27500點，走勢進一步轉弱。若然短線確認失守27000點，呢一波殺到落26000亦屬閒事。
噚日除咗股市冧到七彩，新世界(00017)公布旗下熱賣樓盤柏傲莊3第1同第8座混凝土唔達標，決定拆咗佢再起過，所以會延遲交樓。呢個盤由開售至今一直熱賣，更係一籌難求，今次受影響買家超過800戶，有問題嘅兩座拆咗起過，一來一回要延遲9個月交樓。新世界有賠償方案予買家選擇，至於詳情係點，已有報導，古天后就唔再喺呢度重覆。
新世界處理今次事件可以話有晒擔當，古天后亦相信呢兩座需要砍掉重建嘅樓宇，肯定品質特別好，皆因要維持品牌形象及買家信心，定必份外留神。估計選擇放棄交易嘅買家有限，畢竟鐵路沿線樓盤供應有限。由於呢個樓盤係鐵路沿線物業，港鐵(00066)份新聞稿呢，就擺出一份事不關己嘅姿態，成件事責任推晒落新世界嗰邊，而新世界亦表示出問題嘅兩座樓，唔關港鐵沉降問題。
今次受影響嘅買家，都可以話算執返身彩，皆因新世界肯擔當，補償方案仲有得揀，若然呢個新盤係由港鐵孭飛的話，根據呢幾年港鐵處理唔達標嘅建築問題嘅手法，大有可能係降低個標準嚟「遷就」唔達標部份，邊有新世界咁有擔當，砍掉重建又賠錢。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。