新經濟股 傳統股 只要上升賺錢就係好股
12月9日，多雲，早晚有一兩陣微雨，日間部份時間天晴，但明日起轉多雲有雨。雖然美國肺炎疫情未有緩和，確診個案數字激增，不少州份醞釀進一步防疫措施，甚至可能再封城封關，但投資者則憧憬華府會盡快推出新一輪財政刺激方案，國會可達成共識。隔晚美股先低後高，三大指數刷新盤中紀錄新高，當中標指跟納指再創收市新高。
疫苗正式推出市場，民眾開始接種疫苗，有助加速經濟重啟步伐，不過臨近年尾，唔少投資者趁疫苗好消息推高股市，提早沽貨離場鎮定利潤，尤其喺第一季把握低位嘅投資者，回報極為可觀，年結前希望減低風險亦好正常。目前市場氣氛跟實體經濟背道而馳，主要係大部份投資者均相信疫苗分發，美國以至全球經濟重啟，將推動環球經濟活動。而低息環境及企業盈利反彈，將有利美股明年再創新高。不過市場焦點將由新經濟股重返舊經濟股，有分析員建議投資者係時候買入埃克森美孚、雪佛龍、波音公司、高通、Visa及迪士尼。等傳統股。
而港股情況可能相約，今年表現強差人意嘅傳統股，明年或走出谷底並吸引資金垂青，事實上自11月開始，資金正從新經濟股及高速長股板塊，流向傳統股及價值股板塊，一旦疫情受控，經濟復甦，價值板塊明年或成為股市增長動力。不過喺呢一刻，香港疫情仍然嚴峻下，實難說服古天后買入傳統股，而古天后亦一直強調疫情已改變過往恒常習慣，例如留家工作已成為趨勢，網上購物習慣亦已形成，而線上商業活動增加，凡此種種都對傳統行業包括地產租賃、零售及航空甚至酒店業帶嚟衝擊，即使疫情過後相關行業將復甦，但習慣改變勢令相關行業無法回復過往增長嘅日子。
反而新經濟股因為疫情改變生活消費習慣，以及商業活動及一般辦公模式而長期受惠，而科技改變未來，新經濟股喺疫情過後，業務亦能維持高增長。古天后反而樂觀些少，疫情過後，經濟復甦，唔排除明年新舊經濟股百花齊放，只要揀啱板塊，新舊經濟股同樣可以有可觀升幅，喺缸邊友心目中，只要上升賺錢嘅股，就係值得投資嘅好股。當然古天后仍然對JATMX睇高一線，作為超長線投資，短線震盪又何必太過在意。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。