新股跟勢炒記緊要識止蝕跳車
6月17日，部份時間有陽光，局部地區有驟雨，日間天氣酷熱。聯儲局一如預期維持利率不變，不過市場關係究竟幾時開始加息，結果鮑爺迴避問題，只係表示近期集中討論縮減買債，話就話加息太遙遠暫時唔考慮，但佢已表示隨住更多數據披露，縮減QE嘅時間表上會更多表態。對於通脹問題，鮑爺嘅答案更為矛盾，又話通脹將繼續上行，但又話驅動通脹嘅因素係暫時性，咁即係通脹短期唔會停落嚟，債息即見反應，10年期美債息升至1.58厘。市場解讀鮑爺嘅講話係轉咗鷹啲，預期收水已無懸念，只係時間問題。美股應聲而下，三大主要指數全線下跌。
港股夜期跟ADR亦隨之而下，預期今日港股再向下尋找支持，暫時恒指喺二萬八應有一定支持，不過更大支持喺3月及5月份低位，即27500左右。純以技術走勢嚟睇，6月初一支大陰燭跌穿29000之後，恒指反覆向下，已跌至近保力加通道底部28437點，技術走勢轉弱，而事實上期權put重倉喺28000點，不過期權金未見超過200點，即係27700至27800點料有不俗支持。至於期指密集區喺28700-至28800點，估計指數即使回調至27700尋找支持後，6月稍後時間可重返28000水平，加上半年結粉飾櫥窗效應下，進一步重返密集區28800點機會仍在。即係港股呢個月都係以上落市為主，既然五月不太窮，預期六月亦唔絕得去邊。
噚日破晒新股賺錢紀錄嘅時代天使(06699)上市，抽中新股嘅賺到笑，如無意外都袋袋平安，無貨上市後先追貨，跟勢短炒就自己執生。溫故知新一下，今年2月上市嘅快手(01024)上市初期一樣炒到出煙，股價最高見417.8元，較招股價115元升2.6倍，其後股價隨住高增長股有資金流走而回落，高位累計唔見一半有多，高追又唔肯嚴守止蝕，依家真係企咗喺度。而時代天使噚日高位490元，較招股價173元升1.8倍，收市報401元，雖較高位回18%，但仍較招股價升131元。新股剛上市急升，都係受短線供需影響，當估值逐步回歸基本面，股價由高位回落亦屬正常，公司基本因素從未有改變，變嘅只係資金需求。古天后當然唔贊成高追新股王，不過唔阻人發達，要入場參與炒作，只有順勢而行，一見唔對路要識跳車逃生。其實市場上有咁多選擇，除非公司稀缺性度高，否則未來再有同類公司上市，估值過高嘅股份，終會被資金唾棄，唔覺意接咗火棒，又唔願跳車止蝕，坐到頭髮白埋都未見家鄉。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。