新股風光不再 暫難再見首掛爆升
4月9日，多雲間中有驟雨，天氣清涼，間中吹強風。美債孳息回落，美股隔晚向上，大型科技股繼續做好，道指升57點；標指再創收市新高，升17點；納指升1%，升140點。經過一輪橫行整固，重磅科技股FAANG再見資金流入，蘋果公司更升近2%，主要係市場認為美國通脹短期內難實現，債息短期內上升動力大減，高增長股再見吸引力。
踏入4月，美股表現持續向好，市場完全無視拜登政府擬調高聯邦企業利得稅，由21%上調至28%；而美國財長耶媽亦與G20商討，推出全球世紀稅改，共同實施最低企業稅。無論如何，加稅意味住企業支出將增加，定必影響盈利表現，同時將影響上市企業估值，從而遏止股市上升潛力。高盛上月曾估計，一旦拜登嘅加稅計劃全面執行，標指成份企業明年盈利增長將最多被削最多9%。留意拜登加稅方案，或隨時拖累美股進行大幅調整。
另一方面，內地上月有超過70間中企撤回喺科創板嘅上市申請，反映內地當局或收緊上市標準，唔少中企知難而退，先撤回申請。加上近日內地銀根趨緊，以致中港兩地股市氣氛受限，上升動力明顯不足。而港股正處於成也北水，敗也北水，上月北水流入港股速度及數量均大減，港股即死蛇爛鱔咁款，踢極亦升唔起，持續區間內移動。
而一直緊張嘅中美關係未見改善，反而愈趨緊張，雙方角力令夾喺中間嘅香港隨時變炮灰，當然樂觀一派認為美國逼使中概股於美國退市，定必令大批中概股愛回家，中金剛發表報告，當中至少有19間中概企業符合回歸條件，融資規模更高達1705億元，只係市場對新股熱情不再，近日更有唔少新股首掛即破底，跟之前新股必爆升嘅情況大有不同。
雖然港股喺次季首個交易日開局表現唔錯，可惜遲遲未能重返二萬九水平企穩，一副拉牛上樹嘅死樣，而北水亦未見積極掃貨，大市成交動力不足，難免限制升勢，暫時呢個月上落市格局不變，至少恒指要重上29500企穩，甚至重返三萬水平，港股方能擺脫困局，重拾升勢。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。