新股高開翻倍高追風險亦倍增
6月16日，部份時間有陽光，局部地區有驟雨，天氣炎熱。聯儲局進行一連兩日議息會議，美國消費者對通脹預期創下8年新高，有預測指聯儲局有更大可能提前「收水」，隔晚美股腳軟。標指跟納指創新高後回落，分別跌8點及101點，道指收市則跌94點。雖然市場預期聯儲局今次將保持利率不變，但等待鮑爺會後嘅講話，以及政策聲明，以了解聯儲局打算幾時開始退出面對疫情危機期間所實施嘅措施。
事實上，市場唔少投資者已預計聯儲局提前收水，摩根大通CEO表示，公司正「有效地囤積現金」，咁做係因為預期利率上升，債價下跌時掃貨，而目前唔係shopping嘅好時間，反而要趁呢段時間儲定子彈。細摩有咁嘅決定，主要係唔認同通脹只係短暫上升，佢哋認為通脹或持續一段時間，遲下將會見到更高嘅利率及通脹，要為此作好準備，公司已預留5000億美元現金，等待高利率把握更好嘅投資機會。
而港股已經一段時間炒股唔炒市，而流入市場嘅資金未見顯著增加，一直係資金於唔同板塊之間動，完全係塘滾塘魚格局，未見任何突破。恒指再度重返多條移動平均線之下，目前係等緊聯儲局議息結果，只要鮑爺講話溫和，唔排除明日再見反彈。
今日焦點肯定係今年暫時凍資王時代天使(06699) 股價及相關新聞 ，暗盤已升近倍，每手穩賺39000元。今日開市高開一倍係意料中事，只係本來時代天使估值已唔平，仲要高開一倍當然唔建議追貨。至於幸運抽到有貨喺手，當然係有食當食，將盈利鎖定袋袋平安。
中國燃氣(00384) 股價及相關新聞 噚日中途停牌，主要係沽北省十堰市發生氣爆事件項目，為中燃喺湖北37個城市燃氣配送項目之一，公司正協助政府調查，暫未能確定事件對集團財務的影響。由於公司將於6月28日公布業績，暫時唔可以發表任何財務資料，要等到業績先會有更多相關資訊。預期呢段時間中燃股價較為偏軟，暫時喺調查未完成，事件未明朗化下，都係咪多手博反彈，不過股價喺24元料有支持，有貨喺手走唔甩，暫時睇住呢個位，守得住唯有捱住價，等埋業績睇下有冇反彈。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。