新能源相關股仍為資金追捧
1月11日，天氣寒冷及非常乾燥，大致多雲，日間部份時間天色明朗，但一唔見太陽真係特別凍過人。美股勢如破竹，美股上周五繼續創新高，三大指數齊齊破頂。總結一星期，道指、標指、納指分別累升1.61%、1.83%、2.43%。市場未有理會上周美國國會暴動，主要係個別事件對經濟、企業盈利及利率方向唔會有影響。而美國總統大選塵埃落定，兼且由民主黨全取國會參眾兩院控制權，令投資者更清晰，令增加刺激措施嘅預期升溫。港股ADR亦做好，按比例計恒指已升至28200水平。
美國禁投令對港股影響逐步浮現，三間美資券商宣布提早終止一共484隻衍生產品買賣。產品提前玩完係發行商自己決定，並將自願進行回購安排，以減輕相關產品提前終止對投資者及市場帶來的影響。一般發行商進行回購，須同時提出買價及賣價報價，不過面對美國行政命令所限，發行商無法提供賣價，港交所(00388)首度作出豁免「賣價報價」。相關產品今日仍能如常交易，最後交易日期是1月22日，1月25日起暫停買賣。好彩係呢幾百隻衍生產品相對港股整個衍生工具產品數目極度有限，預期對市場影響有限。
不過中美角力已漸趨白熱化，由最初雙方戰場喺貿易方面，戰場已拓展至科技、金融、甚至連新能源亦被視為新戰場。中央去年提出2060年實現「碳中和」(淨碳排放降至零)以來，新能源股尤其係風力及太陽能發電相關股份灼手可熱，係國策扶持仍有炒作空間，唔少券商已相對調高相關股份嘅目標價。內地政府嘅目標是要實現「碳中和」，着眼點在於係咪有足夠新項目，而並非新能源電力商補貼「拖數」問題，因此市場焦點係企業嘅產能擴張，講到底都係上游企業較為有利，尤其行業龍頭如信義光能(00968) 及福萊特玻璃(06865)等。
而新能源汽車亦係資金重點投放嘅板塊，只係相關股份急升已呈超賣，若然今日又再裂口高開，唔排除有獲利沽盤出嚟食糊，不過中線計新能源氣車仍受追捧，貨重嘅可以游水，但貨唔多嘅就不妨坐一會，睇款升勢有餘未盡，尤其吉利(00175)已見唔少大行大幅調高目標價，閒閒地目標價調高至40元樓上，大摩更進取，目標價更大幅調高至50元，打返個八折都見40元。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。