日央行貨幣政策調整或對市場帶來更大震盪
12月21日，天晴，天氣乾燥，早晚較為清涼。隔晚美股反彈，早段先跌後回升，道指升92點，標指跟納指分別升4點及1點。標指下試3800後回穩，關鍵係能否重返3900支持位並企穩。噚日金融市場出現震盪，主要係日本央行議息竟放鷹，宣布容許日圓10年債息波幅上限，由0.25%提升至0.5%，雖然唔叫做加息，但過往一直堅持嘅極度寛鬆貨幣政策有所調整，並暗示明年有加息可能。本來喺全球央行進行緊縮貨幣政策之際，日本貨幣政策仍然寬鬆，並成為全球借貸成本最低嘅國家，但目前連日本都開始調整貨幣政策，係令到全球借貸成本進一步增加。
日央行呢個舉動，刺激美10年債息由3.5%急升至3.7%，之前美10年債息回落至3.5%之下，係反映市場預期美息未來將減1%，不過以目前美國通脹雖受控，但未加速回落之際，美國距離減息仍有一段頗長時間。若然日本進一步緊縮，唔排除美債息進一步回升。雖然日債擴閣咗債息波幅上限，但同時宣布加大QE規模，話日本全面收緊貨幣政策又講唔通，只係日本開始容許息率上調，明年會否進一步收水，停止買債轉為縮表極為重要。一旦日本停止買債，市場資金緊縮，金融市場必見震盪，一如美國今年第一季宣布縮表後，美股都捱過一段日子。而匯市一值有借入日圓進行carry trade，或引發拆倉潮，呢點大家要留意，不得不提防。
至於美股進一步調整，留意科技股等持續跑輸，明顯係市場資金由之前極度樂觀轉為審慎，唔少股民都持有嘅Tesla，股價更弱過藥煲，跌穿200美元後唔多識彈，雖然跌至150美元樓下，跌勢似放緩並有支持，但反彈能否重上165元成為疑問。有貨嘅要趁反彈沽出，抑或死守，值得關注，只係目前可以肯定係Tesla股價高峰已過，並已喺200美元水平開始進行派發。
港股12月反彈目標超額完成，近日成交持續縮水，明顯係聖誕節長假前，缸邊友已無心戀戰，港股呢段時間出現日升日跌，資金由一線股轉炒二線再轉炒三四線股仔，好明顯現水平嘅港股，值博率已大減，目前於19000水平爭持，要提高勝算，古天后會等大市回調至20日線，甚至100日線水平先再入場買貨，即係見18800樓下先再分注吸納，而較穩陣嘅入場價，將會係18200至18400水平。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。