10月13日，大致天晴，繼續風和日麗。隔晚美國公布9月CPI略高於預期，但美債反應比較大，兩年債息再度升穿5%水平，美股借勢回吐，三大指數下跌，道指跌173點，標指跟納指分別跌27點及85點，暫時美股表現仍然反覆。
9月CPI同比增長3.7%，略高於預期3.6%，其實3.7%呢個增長幅度又唔算好嚴重，只係市場預估3.6%睇得樂觀咗。核心CPI回落至4.1%，跟預期一樣。從核心CPI環比增加0.3%去睇，明年通脹要降至美聯儲目標2%，都相當困難，明年核心CPI應該喺3%至3.5%水平橫行。
目前年底前再加息機率只有35%，估計明年初美聯儲仍會沿用舊招，繼續不時放鷹去壓抑通脹，最快要明年中先可能首次減息，明年大約減息3次。美國幾間大型科企舊年6月開始裁員，9月達至高峰期，估計因裁員而錄得嘅削減成本效應，要到Q4先會反映到，明年美國科技股盈利有望回復較顯著增長，呢個係有條件推高美股嘅動力。加上明年美國大選，若然再附加埋下半年開始減息，明年美股應該好景嘅。
中港股市呢邊，前日國家隊入市買四大國有銀行股，雖然只有區區5億，銀碼唔大但意義重大，話晒係2015年至今再出手，對中港股市有正面作用，令市場氣氛改善。不過噚日嗰幾隻受到阿爺祝福嘅內銀A股，表現唔想強勁，市場未有積極跟進，深滬兩市成交只有8300億元，未見有資金流入。至於港股噚日再升345點，成交額回升至1011億元，成交略見改善，但未見大量資金流入，無資金配合下，六個交易日累升千點，升勢難以持續。
再睇埋日線圖，更出現三個裂口，去到第三個裂口通常係消耗性裂口，短線回調在所難免，隔晚夜期即見淡友反擊，ADR跌逾300點，又重返萬八水平之下。黑期今早亦跌逾300點，預恒指低開再穿萬八關，現貨周三低位為17890料有少少支持。至於較大支持係20日線，大約係17700水平，能夠守到反映反彈升浪未完結，若然20日線再度失守，整個反彈浪完結，大市有機再向下破底。留意呢幾日都係由夜期主導，翌日以裂口上升及下跌後，然後橫行，日市波幅有限，完全係連即日短炒指數嘅機會都被剥削，呢情況，都係得個睇字。今日預期繼續窄幅上落，全日波幅大約17900至18100左右。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。