明年三月騰訊大股東轉向沽美團套現
11月17日，日間部份時間有陽光，早晚較清涼。美股隔晚持續調整，尤其標指逼近4100阻力位，加上出呈超買，回調亦屬正常。加上波蘭境內被導彈擊中，雖然美方已表示導彈非由俄羅斯發射，但喺地綠政治氣氛再轉緊張下，仍影響投資者情緒。另一方面，美股由上月中低位反彈，累計已上升超過15%，並已呈超買，逼近重大阻力區，沽壓增加亦理所當然。
隔晚美國又有經濟數據公布，10月零售數據環比增長1.3%優於預期，並創下八個月以嚟最大升幅，同比增長達8.37%，雖然油價回落令能源支出減少，但13項類別之中有9項錄得正增長，即係其他開支仍然增加。雖然近半年大型企業出現裁員潮，但實際上美國就業市場仍有過千萬個待業職位，即係就業市場唔係太差，呢個亦係聯儲局決定未來息口走勢嘅另一個主要因素。即使通脹有機會見頂，但就業市場理想，美國係無條件減息，而要美股完全走出熊市，聯儲局嘅貨幣政策由收緊走向放鬆係先決條件。美匯指數已失守上升軌，市場資金由保守轉向進取，而美匯指數回落，有機會係美股步出熊市嘅先兆。不過通脹仍未能確認見頂，而通脹係會引致美元荒，但近日美匯指數回落，有助抑壓通脹，呢個係美股自10月強力反彈嘅主要原因。
港股由14600上月低位反彈至18400水平，反彈力度強勁，期間成交亦大增配合升勢，不過噚日因為地緣政治因素，淡友即借勢反攻，噚日大市回落，成交額略有減少至1732億元，暫時大市仍然有充裕資金，加上上月沽空嘅中概股係空倉回補下發力，中概股帶動整個大市向上。
騰訊(00700)公布第3季業績已開始回穩，環比出現增長，有機會走出谷底，業績公布前人民網呢個官媒竟然話要把握投資網遊商機會，一度刺激相關股份噚日午後急升，而近日北水密密掃入騰訊，似乎呢一個板塊已得到阿爺嘅祝福。騰訊發放一份表現唔錯嘅業績同時宣布以派發美團(03690)作為股息，情況一如之前分派京東(09618)一樣，留意仍有大量騰訊嘅南非大股東，日後套現對象多咗美團一個，喺估值方面，美團遠比騰訊高，明年三月當南非股東嘅美團股份到手，可能就會沽出呢批美團套現，但講緊嘅都係幾個月之後嘅事，暫時美團都係跟隨大市上落。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。