明源雲假盈警 實為真盈喜
1月25日，天晴及乾燥，氣溫回升至22度，呢個星期天氣唔錯。全球疫情經過一年後，仍未解決，市場重燃對疫情嘅憂慮，打擊投資者對企業盈利表現理想，及華府準備推出刺激經濟措施嘅樂觀情緒，美股上周五個別發展。納指再創收市新高，收市升12點；但道指跟標指分別跌179點及11點。總結一周，美股三大指數，道指、標指、納指分別累升0.59%、1.94%、4.19%。
雖然美股暫時已再無新嘅利好消息刺激，始終拜登上台後中美關係得以改善只係憧憬，而疫苗面世後又遇上運輸及成效較預期差嘅問題，全球經濟能否復甦存疑，無論美股抑或中港股市，升勢有所放緩，已欠缺之前嘅氣勢。港股呢一輪升勢，主要由北水大量流入支撐，港股通淨流入金額屢創新高，市場資金極度充裕，上周五港股僅屬正常回吐，短線港股仍然喺高位整固，恒指即使進一步回吐至28800回補上升裂口，頂多去到28500水平已見支持。
睇返近日內地公布嘅經濟數據，中國為2020年當全球受疫情影響下，少有仍錄得經濟增長嘅國家，預期將吸引全球資金繼續流入內地金融市場，而港股作為大部份中資股落腳嘅橋頭堡，港股當然直接受惠。另一方面，美國財政部公布內地於去年11月增持美國國債，內地持有美國國債總值增至1.1萬億美元，為6個月來首次增持。雖然中美關係喺拜登上台後有望改善，而美國政治及經濟前景仍存在不確定性，且美國或會繼續實施低息政策，弱美元將維持一段時間，令資金有望流入新興經濟體。預期今年亞太區股市表現，或可超越美股。
不過美股踏入1月中旬開始業績期，美企陸續派成績表，而2020年第4季標普500企業盈利預估年減9.7%，當中盈利增長以健康醫療、原材料、科技及民生消費類股表現較佳，而科技股今年仍然睇高一線。展望今年首季，美企盈利可望重回正增長15.6%，而2021全年盈利預估年增22.1%，其中科技股將續受市場關注，尤其係股價淨值偏低及營收穩定增長嘅股份。即係就算新興市場追落後，亦唔等於美股會失去光彩。
上個星期古天后再度推介明源雲(00909)，表示50元水平以下可以搵位上車，結果呢頭上車，嗰頭明源雲就破頂創新高，但上周五則見回吐。公司於周末期指發盈警，因優先股嘅公允價值虧損約9.89億元(人民幣，下同)，股東應佔虧損介乎6.9億元至7.5億元。但剔除相關因素影響，集團經調整淨利潤介乎3.3億至3.9億元，2019年經調整淨利潤約2.36億元，按年升40%至65%。呢份表面睇落係盈警，實際上係一份盈喜，作為內房軟件業龍頭(市佔率18.5%)，明源雲為科指成份股，亦係北水愛股之一，大行預測其 SaaS收入複合年增長率達61%，經調整淨利潤率21%，遠勝同業，而國產軟件替代將係未來幾年一大炒作主題，明源雲股價若然因為呢份『假盈警』回軟，又係另一個吸納好機會。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。