10月27日，部份時間有陽光，日間乾燥。Google跟Meta公布業績後被拋售，隔晚美股早段低開後曾見反彈，但至中段沽壓再現，收市三大指數續跌，道指跌251點，標指跌49點，納指再跌225點。由於債息高企，令偏高嘅美股受壓，即使美企業績交到功課，但未來增長做唔到好勁嘅數字，市場喺畏高情況下，美股無奈都要回。
過去半年，市場炒AI概念炒到過晒籠，自然到第三季業績就會將焦點放喺相關股份呢部份嘅業務增長上，以Google為例，其雲業務增長只有22%不及預期，股價回吐逾一成，但微軟嘅雲業務只係增長29%，唔見得特別出色，但因為業績公布前已從高位回落，所以反而公布業績後有得升。呢兩隻重磅股嘅例子，說明咗美股要回調，完全係估值過高問題，待回調去返一啲合理水平，美股自然會有買盤出嚟。
其實喺八成已公布Q3業績嘅美企之中，超過八成企業都交出一份優於預期嘅成績表，美國經濟表現其實唔差，Q3經濟甚至可以話係強勁，喺暑假效應下，美國人喺Q3再度大量消費，GDP又推返上去4.9%，淡友就係利用呢啲數字，炒高美債息同質低股市。不過10年債息衝上接近5%後，隔晚已回落至4.83%。
環球製造業正步入復甦週期，美國耐用品訂單經過兩個月下跌後，最新錄得4.7%增幅，遠勝預期1.7%。其中運輸設備訂單增幅最大達12.7%，製造業復甦可望帶領明年美國經濟有輕微增長。至於復甦能否加速，要睇明年幾時開始減息，以及減息幅度速度。目前息口見頂機會甚大，市場預期最快明年6月開始減息，若然主要是CPI數字較預期為低，有望提早減息。
雖然美國第三季經濟表現強勁，10年期債息不升跌，只係市場焦點轉向季度企業業績，以未來增長預期未必太高作為美股回調借口。雖然美股三大指數續回，但中概股靠穩，反映中概股嘅金龍中國指數升0.46%，港股ADR升逾百點，夜期亦升近百點。恒指今日若高開，料再挑戰噚日17200阻力，成功企穩再向上推進，不過10日及20日線，預期短線17400-17500為較大阻力，繼續成為反彈最大阻力。留意下周一期指結算，呢兩日轉倉高峰期，指數推高轉倉，反而不利下月反彈，留意結算後，好淡雙方會否再於17000-17500角力，未能修復任何一條平均線，港股11月再做低位機會仍在。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。