未見新資金流入 港股成交持續低迷
2月16日，大致天晴及乾燥，早上相當清涼，午間氣溫略為回升，晚上仍然清涼。美股隔晚繼續反覆，美國消費表現強勁，1月整體零售按月升3%，遠超預期升1.8%，係23個月來最大升幅，經濟偏強令美聯儲更有借口加息，美股早段下跌。不過市場同時憧憬美國經濟前景理想，三大指數由跌轉升。之前都講過標指目前喺4100至4300之間上落，隔晚標指回落至4100水平，又守住唔穿，不過入場資金又唔算積極，目前市場係擔心經濟強勁，令通脹高企，FOMC可以繼續加息，但另一方面，經濟表現理想，企業盈利可以有所表現，自然就會有資金逢低吸納，而本身有貨嘅投資者，亦唔急於現水平沽貨。
雖然唔少大型企業已陸續宣布裁員，累計裁員數字已達10萬，奇怪係美國嘅失業率未見上升，美國人因為失業導致破產嘅機會唔大。反而喺油價及資源價格從去年高回落後，令一般市民能源支出減少，更多人願意花錢消費，呢個亦係隔晚公布嘅零售數據表現強勁嘅原因。既然美國人唔等錢使，自然唔急於沽出手上美股持貨，令美股喺現水平高居不下。
至於港股連續見有資金流出，大市噚日再度回落301點，重返20800水平。不過喺北水入市變得較為積極下，成交都有1123億元，未有再萎縮，預期今日港股有機會反彈，關鍵都係要睇成交配合與否。若然成交仍然喺1200億水平之下，港股難以作出較大力度反彈，加上10日及20日線失守後，將由之前嘅支持位，變成短線阻力位。尤其要留意北水並唔係只買不沽嘅資金，北水操作喺1月份已經短癮得多，市場未見新資金流入下，港股可能係出現日升日跌嘅情況。
近日港股亦愈嚟愈多公司趁大市反彈抽水，連領展(00823)都話要供股集資，持續有多間公司向市場抽水，若然再無新資金流入，市場本來嘅資金都有被抽乾嘅一日，呢個亦係近日成交持續低迷嘅原因。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。