次季強勢開局 但上落市格局未改
4月7日，大致多雲，日間部份時間有陽光，間中風勢頗大。美股隔晚結束三日升勢，由周二高位回落，道指跌96點；標指跟納指分別跌3點及7點。不過美股4月開局表現強勢，市場相信強勢可延至整個4月，只係機構投資者繼續調整組合，資金減持科技及高增長股，流入去年受疫情衝擊最嚴重，今年可受惠經濟復甦嘅傳統股。喺預期下半年全球旅遊活動或逐步恢復下，出行股將跑出，傳統股表現或優於高增長股。不過古天后對於科技股及高增長股後市表現仍有信心，尤其整體經濟結構已完全改變，科技改變生活習慣，疫情更成為新經濟主導資本市場嘅催化劑。
港股經過幾日復活節長假期，放假期間外圍股市表現理想，港股今日預期可延續假期前4月1日開局強勁勢頭。不過呢個月古天后睇好港股表現之餘，不得不打醒十二分精神，尤其要留意地緣政局變化。中美地緣政局風雲變色，全球戰艦部署之多為呢數十年嚟甚為罕見，除咗戰事風險升溫，美國第一季10年期長債孳息趨升，令新興市場響起走資警號，一場環球經濟戰已悄然展開。
中美局勢喺拜登上任以嚟，未見顯著緩和，近期兩國陸續派遣航空母艦駛入中國東海和南海海域，外交上火藥味濃，留意一旦地緣政局進一步惡化，難免對環球股市帶嚟衝擊。幸而現階段中美兩國仍停留喺打嘴炮階段，未見擦槍走火，暫時市場未見因此見大波動，估計港股呢段時間可隨外圍做好，而於月內逐步向上推進，恒指若能收復50日線(29297)，再挑戰29500，30000關或有望收復，扭轉3月份弱勢，但仍取決於成交能否配合。
港股假期前成交縮水可以理解，而人行貨幣政策於上月傾向較緊，令北水流入速度放緩，支撐恒指上升動力大減，若然成交未能回復暢旺，港股仍難走出上落市格局，港股表現仍受內地資金政策影響。此外，美國債息走勢仍然係市場焦點，將主導全球投資市場資金流向。而債息趨勢勢未改。債息上升因素眾多，包括通脹預期升溫，憧憬經濟復甦，且市場亦開始憂慮美國財赤問題，當政府續發債，市場是否有足夠需求吸納。市場目前視10年期債息2厘為「新興市場走資警戒線」，只要貼近2厘，包括中國在內的金融市場必然較美國更為動盪，唔排除呢個狀況或於第二季內出現。缸邊友喜見第二季強勢開局之際，仍要打醒十二分精神，升市切忌過度興奮，跌市亦無須過度驚慌，習慣第一季嘅大起大落，唔排除上落市格局為今年餘下時間嘅主調，資金將於不同板塊之間輪動，舊年死坐新經濟股、科技股及高增長股已行唔通，今年要更靈活走位，方能提高勝算。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。