汽車股吉利長汽最值博
2月10日，多雲有雨，早段雨勢較為頻密，晚上雨勢減弱，天氣清涼。隔晚美股個別發展，道指結束六連升，收市跌9點；標指亦跌4點收市，但納指升勢有餘未盡，再升20點創收市新高，報收14007點。市場繼續憧憬新一輪刺激方案快將落實，加上唔少大型美企業績強勁，市場情緒保持高漲。雖然美股個別發展，但港股ADR跟夜期都做好，港股喺新年長假期剩餘一個半交易日，睇嚟呢兩日都可以安然渡過。
唔少缸邊友都有疑惑應唔應該減倉過年，其實喺上月古天后已表示喺市況反覆嘅時候，已表示要減減倉位，不過恒指表現再反覆都好，個別股份及板塊持續有資金流入追捧，尤其踏入2月初大市即使回落至接近28200水平，當坊間唔少聲音指港股有機會失守二萬八關並要作出較大幅度調整之際，古天后已表示，港股料可守二萬八水平，只要二萬八水平不破，港股基本上只係合理調整，反而係吸納好機會。
而二月初大市回調，主要係市場擔心內地有可能閂水喉，但其後人行已就相關市場猜測大派定心丸，指人行無意改變目前貨幣政策，仍然係視乎市況作出鬆緊有度嘅策略，並維持市場流動性，意味住阿爺並未有閂水喉意圖，而保持金融市況維定發展，係重點國家戰略，而原因喺古天后之前嘅專欄文章已有詳細分析，唔再長氣重覆。
展望港股後市發展仍樂觀，雖然北水假期暫停令成交縮水，但資金仍然積極流入重磅科企及新股，尤其上周五上市新丁快手(01024)僅回氣一日，噚日已再創收市新高，由於快手已被納入多個恒指服務公司旗下指數，並已具備納入港股通嘅條件，預期快手最快可於農曆年假期後，被納入港股通，屆時北水湧入，快手股價要重返暗盤高位，即400元水平易如反掌。
北水今年成為港股主角已成定局，內地資金南下尋找投資對象，預期今年襹水可維持穩定及長期性流入，恒指非但可突破30000水平，今年內更有機會挑戢新高。而當中最受北水歡迎嘅，當然係港股獨有、A股市場冇同類上市股份嘅優秀企業，如騰訊(00700)、美團(03690)及港交所(00388)等，呢類稀缺性股份股價難以估頂，只會沒有最高，只有更高。
另一類北水喜好股份，當然係符合國策方向長線主題，及有望於下月兩個中進一步受惠嘅板塊，如新能源及汽車股板塊等。而汽車股古天后睇好吉利(00175)跟長汽(02333)，前者拍到戴姆勒呢個大碼頭，齊齊發展新能源車引擎，後者則著重投資汽車晶片及自動駕駛及智能化方面技術研究，兩者各有千秋。雖然比亞迪(01211)都係北水愛股，但相對估值偏高，以現價估值計算，吉利跟長城仍然超值，現價買入仍有可觀上升空間，更具值博率。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。