油價升得快可以回得急 提防油價升勢已屆黃昏時
3月4日，早段局部地區能見度較低，日間溫暖，漸轉天晴。俄烏局勢仍然緊張，加上加上美國就業數據好壞參半，鮑爺亦無表示今個月會唔加息，隔晚美股高開低走，三大指數倒跌收市。再加上喺俄羅斯軍隊發動攻擊後，烏克蘭嘅一座核電廠冒出濃煙，消息導致美股期貨進一受壓，三大指數期貨喺亞洲時段再跌逾1%。
港股表現更加慘不忍睹，港股連日創出兩年以嚟低位後，隔晚ADR繼續下挫，恒指按比例計算跌近400點，險守二萬二邊沿，睇嚟二萬二呢個支持位，今日將受到考驗，失守後支持位大約係21500至21800點。
自俄烏爆發戰事以嚟，本來已強勢嘅國際油價更上一層樓，自歐美國家對俄羅斯進行嚴厲制裁，面對全球石油供應不穩，而疫後需求漸增，油價近日狂飆。雖然已有消息指傳美國主導釋放石油儲備，但亦無助遏抑升勢，更帶領整體大宗商品本周邁向1960年代以來最大單周升幅。
喺呢度時間，產油國盡享油價升勢賺到盡，呢個時候你急佢唔急，暫未見大量增產以助西方國家撲火。西歐國家為自救，各石油進口國勢必下決心加快推動綠色能源建設，減少對傳統油氣嘅依賴。正因如此，雖然眼前油價即使坐住直昇機嘅，處於超級上升周期，但早未有搭上早班車嘅，依家先嚟趕尾班車，要提防升得快時跌得急。隨住全球能源加快轉型，當前傳統能源夕陽雖好，卻已近黃昏。目前表面係俄烏之間嘅戰爭，同時亦係大國之間嘅能源暗戰，經此一役，全球能源發展格局必將迎來大變天！
喺俄烏爆發戰爭之前，近呢十年都叫做天下太平，雖然國與國之間難免有意見不合，但亦只限於打嘴炮，紙上談明，未似今次俄烏打真軍，正因如此，油價此前虙於相對穩定狀態，加上各國簽訂關於氣候的《巴黎協定》，推動全球節能減碳以應對氣候危機，減用化石燃料，增加可再生能源應用，成大勢所趨。各地政府都積極推出稅務及補貼政策，加快達標。相反，坐擁大量傳統能源資源嘅國家，長期利益將會受損。
俄國作為全球第二大原油出口國，當然深感威脅，近年借歐洲各國減碳，加大供應天氣予歐洲各國，並藉此揸緊歐洲嘅經濟命脈。呢一點，其實美國前總統侵侵早已提出警告，可借個個當耳邊風，如今俄烏亂局下，歐洲面對能源中斷，亦只可以話自食其果。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。