8月16日，部份時間有陽光，有一兩陣驟雨，日間天氣酷熱。無幾耐惠譽先調低咗美國信貸評級，啱啱再警告可能下調幾十間美國銀行評級，此話一出，難免打擊市場氣氛，隔晚美股三大指數齊齊跌逾1%，道指跌361點；標指跟納指分別跌51點及157點。喺對沖基金完成冚倉後，美股已失去再推升動力，喺估值又唔係平嘅情況下，稍有利淡消息，即向下尋找支持。
美國7月零售銷售環比增長0.7%，較預估的0.4%更強勁，亦已經連續4個月回升，反映美國經濟較預期中好。再有美聯儲委員出嚟放鷹，支持進一步加息，10年債息升至4.22%，市場擔心經濟強勁令美聯儲更大機會喺11月加息0.25%。美息高居不下，減息憧憬減退下，美匯指數回升至103.2，令人民幣急跌，今早喺亞洲時段進一步低見7.33水平，拖累中概股下跌，反映中概股嘅金龍中國指數隔晚跌近2%，恒指ADR及夜期分別跌221點及175點，跌至18300水平，預期今日港股再度低開。
港股一直面對住缺水問題，外資撤退後無回頭，北水只係彈出彈入，成交愈玩愈縮，雖然唔可以完係因為加咗印花稅後，令成交縮水，但交易成本高昂，就連北水都寧願買ETF唔買重稅嘅個股。就連內地都考慮減印花稅吸引更多資金入場，但港府對於減印花稅仍然企硬，暫冇打算減印花稅。港交所(00388)就退而求其次，表示研究將目前嘅交易手數，改為交易股數，即係效法美股咁，可以一股一股進行交易，話咁樣可以吸引年輕投資者入場，有助搞活成交。
其實港股無資金入場，主要係朝令夕改嘅內地政策，嚇怕外資，人哋無法計算風險，索性離場唔玩，至於年輕投資者亦唔買港股，原因係交易成本高昂，加上長期有波幅，無升幅，相反美股呢幾年疫情期間節節上升，屢創新高，美企唔係單靠燒錢推高股價，而係真止為股東創造價值，投資回報遠比充斥住中資企業嘅港股好，年輕投資者棄港投美亦係人之常情。
至於踏入業績期，港股未見有起色，反而喺阿里(09988)交出一份超預期嘅靚仔成績表，股價放咗一下煙花，紅底未企穩就回返接近一成。今日輪到騰訊(00700)出業績，無論業績好與壞，唔排除又係放一下煙花又無影。根本炒業績贏面已唔高，好嘅業績都只係引嚟一堆沽盤，不及預期嘅業績好似創科(00669)更一日插水17%，你話呢啲狀況，點吸引到人入場。博業績如同博大細，不如實際啲過澳門唔係嚟得更直接咩???
阿爺雖然多次表示有政策出台刺激經濟，救股市，但一味打嘴炮，口水大把，真水欠奉，單靠吹水個市可以去到幾遠大家心知肚明，再加上經濟數據每況愈下，淡友唔開大餐做世界先至出奇。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。