港交所獨市生意可放心持有
8月6日，多雲，間中有驟雨及狂風雷暴，灰灰濛濛，呢啲天氣令人提唔起勁。美國公布前周持續申領失業救濟人數大減至293萬人，為去年3月以來新低，反映經濟復甦前景樂觀，即使變種病毒肆虐，感染人數再創單日新高，但無礙美股上升，道旨升271點；標指跟納指再創上市新高，分別升26點及114點。美股處於好高，市場仍分成好淡兩派，花旗預言今年底前，美股將會調整一成，最快會喺9月下跌，並將美股評級從增持下調至中性。不過美企業績交出亮麗成績表，樂觀如瑞信表示市場上漲背後嘅近期力量，係異常強勁的嘅收益報告，而且呢種強勁力量，有望繼續保持到年底及明年。
至於港股上周兩度下試24800水平後已找到短期支持，展開反彈之路，只係內地話就話政策監管只針對個別行業，但近日接連開腔向唔同行業發炮，令港股反彈之路崎嶇不平。搞完手遊同電子煙，噚日官媒向配方奶粉行業發炮，引述專家表示，配方奶粉營銷係影響孕產婦選擇母乳餵養嘅一大原因，需要加強對母乳代用品營銷行為嘅規範。不過內地始終要落實支持三孩政策，古天后又認為呢一次向配方奶粉行業發炮，對相關股份影響唔會太大，皆因出生數字上升的話，就算全民餵哺母乳，仍需要配方奶粉配合，無乜可能完全唔飲奶粉。
阿爺喺監管上忽冷忽熱，一眾股民慨嘆頻頻被割韭菜，不過全球損失最慘重嘅，未必係本地跟內地股民，反而係美國養老基金係最大輸家，皆因中概股被血洗，就算美國人無直接投資中資股，但其養老基金必有投資，美國股民呢次躺著也中槍。
一直鼓吹「中國威脅論」嘅納瓦羅稱，內地政府睇到美國科技巨企，影響力大到足以影響政治權力，內地政底當然唔會畀呢啲事發生喺中國，「先發制人」唔允許中國科企喺中國變得太過強大，但美國退休基金卻因中概股暴跌損失4000億美元(約3.12萬億港元)。中美緊張關係短時間仍難以化解，中概股目前陷入腹背受敵的局面。市場預期由於「滴滴事件」對企業造成陰影過大，中概股將改變策略轉往香港首次公開招股IPO，香港交易所(00388) 股價及相關新聞 做得呢門獨市生意，自然水漲船高，上周古天后已趁低位建議買入，有貨大可放心持有，500元呢啲位，短期都難有機會見得返。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。