港元數碼化順應潮流趨勢
6月9日，大致多雲，間中有幾陣驟雨及幾陣雷暴。市場繼續靜待通脹數據公布，美股隔晚個別發展。道指跌30點，報收34599點；標指變動不大，現價距歷史高位只差5點；納指則升43點。重磅科技股有資金追捧，蘋果公司大好友，再次唱好Apple市值一年至年半時間，可上望3萬美元大關。不過雲服務公司Fastly出現故障，導致多個該公司支援的網頁癱瘓，公司表示不涉網絡攻擊，只涉技術問題，經搶修後已回復正常，其股價亦先跌後回升，收市更升逾一成。
值得留意近日散戶網民抱團股價熱炒之際，相關期權交易急增，投資者希望藉期權交易獲取更大回報。但相關衍生工具，或引發市場更趨波動，美股炒友要密切注意相關風險。而一向被視為史上最關注美股走勢嘅前美國總統侵侵，竟開腔警告美股過高，並指對美國嘅經濟狀況非常憂心，認為美國通脹將變得猖獗及糟糕，警告美國將面臨「大規模通脹」。呢番說話出自侵侵口中，可以話特別諷刺，喺侵侵在任四年期間，正正係佢老人家，多次要求聯儲局減息谷經濟，更於任內後期暴發疫情之際，迫使聯儲局要再次「大水漫灌」，可以話係通脹嘅始作俑者。無論如何，通脹隨時殺到係不爭事實，而各國央行，尤其美國聯儲局持續貨幣寬鬆政策，確令通脹風險上升，或對金融市場，特別係新興市場帶嚟更大衝擊。
金管局噚日公布「金融科技2025」策略，當中提到開始研究本地零售港元數碼貨幣，並會繼續與中國人民銀行合作，就數碼人民幣在香港進行技術測試。咁啱得咁橋，政府今年派錢谷經濟，係以電子消費券方式發放，似乎係為咗推出數碼港元先進行排練。事實上，香港喺金融科技方面一直欠缺全盤戰略計劃，呢方面發展一直畀唔少內地城市及亞太區國家爬頭，競爭力無進則退。雖然嚟到家陣先嚟一個「金融科技2025」策略，確係後知後覺，但總好過不知不覺。
「金融科技2025」當中最值得關注係開始研究「數碼港元」，並參與「數碼人民幣」測試，若成功，不但可分享內地相關發展成果，亦可為未來港元聯匯制度路向提供更多思路。美國自2008年金融海嘯後，不斷狂印銀紙，近月已不少央行已開始部署去美元化，而當呢個成為潮流大趨勢，港元跟美元掛鉤呢個存在已久嘅聯匯制度，或者需要重新檢視。即使聯龨制度係行之有效，而又穩定金融體系嘅基石，但若一成不變，反會作繭自縛，限制經濟發展。如今透過金融科技發展數碼貨幣，可能係優化聯匯制度，減少美元對香港經濟影響嘅唯一出路。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。