港投資者減少本地市場配置轉投美股
7月20日，大致天晴，天氣酷熱，局部地區有驟雨。酷熱天氣持續。美股經過周一先升後跌，隔晚報復式反彈，三大指數顯著上升，道指跟標指分別升754點及105點，納指升幅更超過3%，升353點。雖然IBM及JNJ業績不及預期，但市場一於少理，尤其係美國基金對股票配置比重降至2008年金融海嘯後低位，現金水平則升至2001年以嚟最高，意味住基金手上已無貨可沽，而美股拋售潮暫告一段落，而淡友暫時已平倉收兵。
再睇埋虛擬貨幣近日從低位大幅反彈，同時美匯指數略為下降，反映市場資金再度risk on，資金願意追入高風險資產。不過與此同時，美國通脹高企情況未有改善，大型企業唔係裁員就係減少新增職位或放緩招聘，美國經濟仍有機會陷入衰退，只係市場喺情緒主導下，資金流動更快，炒作周期更短，造成近日美股急升急跌，日升日跌嘅反覆走勢。
政策風險令資金轉投美股
至於港股呢邊，噚日創下只有839億元超低成交額，雖然指數從上周低位20200點水平，反彈至20800水平，但呢段時間未見成交增加，反映成交愈見縮水。喺呢度時間，金管局頻頻接港元沽盤，而本港銀行體系亦已跌穿2000億水平。港元走弱當然跟美元強勢，美息高企，套息活動增加有關，值得留意係大量香港資金湧入美股，單計5月淨買入規模已達88.31億美元(約688.81億港元)，令香港成為美股的最大海外買家，呢個亦係港元頻頻流走嘅原因之一。
同一時間港股成交卻屢創新低，好明顯係玩開港股嘅資金，已轉投美股，其實睇返兩地股市走勢，又好難怪香港嘅投資者有呢個舉動。雖然美股表現反覆，但當地唔少重磅科技股，經過一輪調整後，估值已開始變得合理，即使港股呢邊嘅科技股同樣經過一整年調整後，估值亦變得吸引，無奈內地監管陰影揮之不去，除此之外，內地科企亦面對外國罰款，好以小米(01810)就接連被印度及意大利罰款。當兩地科企估值相約，考慮到政策風險後，亦難怪資金從港股轉投至美股。而古天后亦認為未有涉足美股嘅投資者，亦需要考慮將部份資金配置美股，甚至加重美股配置比例，令投資組合更多元化。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。