港美息差擴大 資金流走壓力增加
6月22日，大致天晴，日間天氣酷熱。美股隔晚反彈，三大指數升幅超過2%，主要係上周美股急跌超賣下反彈，話美股已經擺脫加息及經濟衰退陰影而重新回升，似乎言之尚早。雖然聖路易斯聯儲銀行行長布拉德期望，今次美國聯儲局急速加息，可以好似1994年般使經濟「軟着陸」，並期望今次加息周期亦能化險為夷。不過巴克萊策略師Emmanuel Cau對此並不認同，主要係1994嘅通脹水平只有2.7%，跟上月高達8.6%嘅水平無法相比，即係今次要對抗通脹，貨幣緊縮措施需要做得更多。而大摩美股策略師Michael Wilson更預期，標指將跌至約2900點，先可以完全反映經濟收縮規模。換言之，相比上周五標指報收3674點，仍有兩成下跌空間。高盛亦指目前股市下跌程度，僅反映輕微衰退，目前仍有較大下行空間。
雖然美股超賣下反彈，不過古天后認為喺債息高企下，將限制美股反彈力度。最奇怪係Tesla宣布裁減一成長期員工，並以散工作替代，主要係公司舵手Elon Musk直言短期好快可能出現衰退，裁減長期員工有可能係預咗未來需求或出現衰退。公司如果係睇好經濟前景，理應擴充而非縮減開支，但市場卻將裁員消息當作好消息炒作，隔晚TSLA股價竟然反彈一成，市場行為實難理解。
至於港股可以話偏強，恒指竟能先後收復10、20及50日線，企穩於21000水平之上，不過成交額噚日縮水至1193億元，反映入場資金仍然缺乏。與此同時，資金繼續從本港銀行體系流走，金管局再接112億港元沽盤，銀行結餘只剩下2418億元，連日已流走超過900億港元。喺美國跟香港息差推一步擴大下，港元持續流走係無可避免嘅事，當美國進一步加快收水步伐，資金流走只會進一步惡化，一旦銀行體系結餘跌穿1000億元，屆時本地資產將面對更大回調壓力。
睇返近日港股資金炒作，由重磅科網股ATMJ，至日前爆炒勁殘教育股，至呢兩日更有股仔單日爆升十倍八倍，好明顯係劣幣正開始驅逐良幣，呢個現象亦反映大市本輪反彈已屆尾聲。目前再入市向上值博空間有限，加上美股搖搖欲墜，即使港股再強，一旦美股再見急跌，中港股市亦難獨善其身，既然市況並唔明朗，向上值博空間亦有限，寧願靜待時機，總好過胡亂入場接火棒。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。