9月11日，大致多雲及有驟雨，局部地區雨勢較為頻密及有雷暴。上周五黑雨來襲，港股休市，美股周四及周五兩晚均出現先低後高走勢，但反彈力度一般，但尚算企得穩，上周五道指升75點，標指升6點，納指升12點。暫時美股未見有大跌跡象，目前美股似係好淡對疊，睇好嘅相信息口快將見頂，有利融資成本回落及投資活動增加，所以會見到逢低有買盤入場。至於睇淡嘅係認為目前美股估值太高，以標普平均市盈率24-25倍計，回報率唔夠4%，當10年債息率達4.28%，股票回報相對唔吸引。
標普盈利第2季錄得倒退4.1%，上半年錄得單位數跌幅，估計第3季度可望平穩沒升跌，第4季度或者可回復至高單位數升幅，全年計僅出現輕微倒退。以目前標指水平4450計，26倍以上市盈率又確係偏貴，但考慮到明年盈利恢復增長，一旦開始步入減息，債券息率便會從4.2%降至3%或以下，屆時股市會變得更吸引，所以就算目前美股係偏貴少少，但係減息預期下，回調幅度未必太大，或者只會喺高位整固。
本週三美國將公佈8月份CPI， 7月已回升至3.30%，估計8月會進一步升至3.8%水平，然後趨向平穩。喺過去數月裡購房人數上升，美國租金從7月開始回落，估計呢部份將會由10月開始陸續反映喺CPI身上，並於12月到達峰值。預期CPI喺未來數月會持續反彈，12月前或於3.5%至4%之間徘徊，明年初再度回落，若明年CPI再度跌至3%或以下，美聯儲便開始有條件減息。只要減息，美股嘅投資回報就會變得有返吸引力。
至於港股呢邊，喺上周四晚夜期跟ADR均見下跌，並失守18000大關，黑期亦於萬八邊沿，預期今日港股跟隨向下，即市支持位大約係17800，若然失守17800，預期港股將進一步下試17500及17300向下尋找支持。講到底，自外資撤出中港股市後，兩地股市嚴重缺水，再加上人民幣走弱，進一步打擊內地企業收入，雖然阿爺一再出招欲救經濟，可惜過往多年過度槓桿，今日自嘗惡果，喺債務問題持續困擾下，中港股市一段時間無運行，古天后一直強調港股只會有波幅，冇升幅，近呢半年嘅走勢一直係一浪低於一浪，之前有人認為阿爺救市，港股有望收復二萬大關，都只係一廂情願嘅想法，每日平均成交額不足千億元，可見港股仍然係一潭死水，早已成為投資者眼中棄嬰。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。