8月7日，部份時間有陽光，間中有幾陣驟雨，早上局部地區有雷暴，下午天氣酷熱。上周五美股受非農數字低過預期影響，先高後低。道指跌150點；標指跟納指分別跌23點及50點。評級機構調低美國信貸評級，影響整體市場氣氛，VIX已升至17-18警界線，小心美股走勢隨時逆轉，出現較大幅度調整。
近月美國小非農跟非農數字公布有較大出入，小非農主要反映小企業招聘情況，例如餐飲業及酒店業一直增加人手，都拉升起整個招聘率；相反大企業及政府減少請臨時工，令到反映大機構招聘情況嘅大非農數據表現麻麻。7月非農新增職位只有18.7萬份，創32個月新低，低於預期的20萬份，6月由20.9萬修訂至18.5萬份，反映大企業仍然縮減招聘。其實要睇整個美國就業情況，要睇埋個失業率，由3.6%下降至3.5%，反映整體就業情況唔算差。至旞非農數字中時薪增幅為4.4%水平，近5個月數字已見穩定，暫時唔似再有下調空間，留意工資回升或令通脹回升。留意中小企業工資增長為6.2%，高於政府調查嘅4.4%，主要係餐飲及酒店缺人手，商家都迫於無奈要加薪10%去搶人，可見美國經濟係服務業需求較大。
至於人民幣彈完一輪，又由最高7.12左右回落至7.19，周五中概股又腳軟，不過中概股都係日升日跌，走勢難捉摸，加上阿爺不時出口術，入場炒作等同賭大細。阿爺想救市係事實，但缺水入場亦係事實，一直打嘴炮救市，已經氹唔到資金入場再做韭菜。港股因為阿爺出口術急升二千點後，兩日又抹去一半升幅，跌返一千點，港股呢啲短線波幅，實在趕客，無資金願意入場坐定。
資金只係彈出彈入，短炒為主，上週一、二，港股成交分別增至1850億及1350億，場內資金增加，但恒指日線圖卻走出陰燭，似趁反彈高位走人，多過似買貨。週三一支大陰去返19500水平，但成交又縮水，反映資金未有趁回調再買貨。講到尾，外資一日唔回頭，中港股市都好難有太大起色，跟住啲消息上上落落，繼續係有波幅，冇升幅。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。