港股乏成交配合 反彈之路阻力重重
5月31日，天氣炎熱，部份時間有陽光，間中亦有陣驟雨，初時局部地區有雷暴。隔晚美股休假，歐洲股市做好。雖然美股休市，未為港股帶嚟指標，不過市場資金及投資情緒有所好轉，較早前因為stable coin暴挫而拖累大部份虛擬貨幣急跌，但呢幾日虛幣市場開始振作起嚟，比特幣跟以太幣急升，反映資金傾向risk on，利好美股進一步反彈。
雖然美股反彈勢頭持續，中港股市亦跟隨向上，不過兩地資金未見積極入場，噚日港股成交只有1288億元，北水更錄得淨流出，明顯資金唔多願意喺21000水平再追貨。不過阿爺繼續發功，十萬人參與嘅視象經濟會議先聲奪人，只係未見有具體政策公布，，市場仍關注國務院33項「穩經濟」政策幾時正式出台。留意今日內地將公布較重要嘅經濟數據，將反映內地經濟增長及通脹情況，料對中港兩地股市走勢有一定影響。
現水平入場值博率有限
港股喺欠缺成交配合下，呢一輪反彈浪可以走得幾遠，古天后睇法相對保守，重磅騰訊(00700)、美團(03690)跟阿里巴巴(09988)淪為大戶舞高弄低指數嘅工具，呢個情況係美團身上最為顯著。作為重磅藍籌股，即使未有任何公司相關消息，其股價每日波幅可以達3%至5%，實在教人無所適從。不過明顯地騰訊喺呢一輪反彈浪中，表現已跑輸美團，而阿里則一向積弱，幾時可以重拾紅底股身份成疑，港股喺塘水滾溏魚之下，反彈之路並不平坦。要喺個股之中發掘機會更加係難上加難，呢個亦係無乜資金願意入場嘅原因。
恒指喺21200至21400水平阻力唔細，現水平入場嘅值博率有限，但礙於美股反彈力度不俗，港股呢邊亦難以進取地做淡，目前只能步步為營，以觀望為主。現貨方面，之前喺20000樓下有低位撈貨，亦係時候減磅套利，等待下一次較佳嘅進場點。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。