港股乏成交配合難大步向前
2月17日，多雲，間中有幾陣雨，天氣清涼，周末氣溫將進一步下降。雖然俄軍從烏克蘭撤走部份軍力，但緊張局勢仍未明朗，美股隔晚個別發展，不過收市已大大收窄早段跌幅，道指跌54點；標指倒升3點；納指僅跌15點。美銀公布最近每月基金經理調查，發現基金經理睇淡科技股創超過15年新高，超過四成受訪基金經理認為聯儲局收緊貨幣政策係全球市場最大極端風險。反而「俄烏局勢」喺風險中排第五，只有7%受訪基金經理對此表現擔心，而分別有23%及11%更擔心通脹及資產泡沫風。
雖然股市氣氛偏熊，但非極度悲觀，只有三成受訪者認為今年美股將出現熊市，而悲觀嘅市氣氛，喺現金配置上反，傾向持現金嘅基金經理按月增0.5個百分點，至5.3%，為前年5月以來最多。相反，願意投放資金喺科技股嘅基金經理數目，創自2006年8月以嚟新低。講開又講，雖然隔晚美股跌幅收窄咗唔少，但睇返道指同標指嘅日線圖，兩者均出現一底低於一底，下降軌已形成嘅形態，一旦標指較今年1月4日高位下跌兩成，美股就有機會步入熊市。
至於港股呢邊就一向唔多跟美股走，又或者係只跌美股跌，而跟唔到美股嘅上升步伐，但喺過去一年港股喺內地監管措施下，重磅科技股大幅下調，整體科技股跟恒指均已跌至一個較合理水平，估值亦大幅下調。而踏入今年內地暫時未見再喺監管方面窮追不捨，科技股不僅可以抖抖氣，甚至喺估值低迷下，只要業績交到功課，反有機會估值重評。
而港股開始步入業績期，唔排除市場對業績理想嘅重磅股再度關注，指數權重股近日表現尚算硬淨，有機會強勢再現。而恒指噚日反彈逾300點，重上24700水平，只要內地跟外圍股市無乜大礙，港股短期仍有條件挑戰25000至25500水平。而中央力倡穩經濟，投資者憧憬中央繼續加大投放基建項目加度，相關股份或可睇高一線。不過講到尾，成交多少仍然係港股走勢關鍵，成交一日未回升，港股都只能寸進，未能大步向前。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。