港股二萬二水平爭持好淡攻防戰
2月2日，多雲，日間部份時間有陽光，氣溫回升，周末期間有雨，天氣再度轉涼。隔晚美股先低後高，美國聯儲局一如預期加息0.25厘，加息步伐如市場預料般正放緩，雖然鮑爺已表示今年之內唔會減息，但目前FOMC正討論再加幾次息，令利率升至限制性水平，就會暫停加息。鮑爺亦提到商品和住屋的價格上升壓力似乎正在緩解，但同時警告稱服務業通脹依然強勁，目前未可以話已成功對抗通脹，已擊退通脹言之尚早。
不過，鮑爺堅持未能暫停加息，亦反映佢係對美國經濟較為樂觀，認為目前美國經濟仍然可承受較為鋻縮嘅貨幣政策，經濟有望軟著陸，就業市場亦未見惡化。由於FOMC預期美國經濟唔係太差，今年內亦無需要透過減息刺激經濟。雖然鮑爺未至於放鴿，但言論相對溫和，美股收復早段失地，道指由低位反彈逾500點，收市重返34000水平，倒升6點；標指則升42點，成功突破4100阻力收市，報收4119點，但能否企穩仍要睇多兩三日先可以確定。至於對利率最為敏感嘅高增長股，納指喺今年有望暫停加息下勁升2%，升231點。
由於美股回升，港股ADR亦隨美股向上，升逾百點，重上22200水平，預咗今日港股將高開，但能否高開高走又係另一回事，畢竟港股喺周一出現較明顯嘅見頂回調訊號，而上月期指一個月內急升3000點，若以10月低位計算，3月幾月累計升幅更超過8000點，若然呢一輪升浪結束要回調，由高位計算，黃金比回調0.382嘅話，指數回返去20200，亦即係250日線進行調整亦好正常。預計大市暫時喺22000水平稍為爭持，若然呢段時間未有新資金進場，唔排除下破22000水平後，將分別考驗10日及20日線，日前10日線已一度失守，噚日成功收復10日線，令回調暫停，不過呢兩日一旦10日線再度失守，下試20日線機會將大增。當然美股持續向好嘅話，港股有條件再重返23000水平，好淡決戰要睇實22400，若然大市重返22400並企穩，呢一次回調嘅時間或者要稍稍推遲。留意喺現水平，港股值博率已大減，目前只能以打游擊方式作戰，因為大型回調隨時出現，唔少重磅股亦已升抵較大阻力位附近，炒作走位要較靈活，已經唔再可以好似去年Q4咁坐定定等食糊。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。