港股二萬六有不俗支持
7月27日，部份時間有陽光，天氣酷熱。人家美股升勢持續，三大指數再創收市新高，不過變種病毒全球肆虐，或打擊全球經濟增長，市場對此憂慮增加，或影響未來幾星期美股表現，美股面臨挑戰。另一方面，市場正等待本周聯儲局議息結果，包括對通脹預期，以及何時開始縮減買債，議息結果將於香港時間周四凌晨公布。
至於港股隔晚夜期曾反彈，可惜ADR再走低，夜期最終亦抹去升幅，唔排除今日開市恒指再向下插多下，殺埋26000點嘅牛證重貨區。至於26000點係咪一個支持位，短期嚟講差不多。因為恒指失守27000至29500呢個大型橫行區之後，向下量度跌幅大約係25900，即係呢啲位都差不多。不過港股弱勢已成，噚日裂口下跌失守250日線27198點，即失守傳統牛熊分界線，而累計跌幅亦達兩成，技術上已入熊，只係家陣都唔興講乜嘢牛市熊市，但250日線將由支持變為阻力，即係港股縱使有反彈，27200點阻力甚大。
港股五未見窮，六未有絕，反而七唔翻身係反艇，暫時港股走勢似足2018年上半年，年初見頂後反覆回落，若然今年係2018年翻版，咁下半年恒指仲要落多幾重點，到年底見埋23000方能罷休。不過歷史未必再重演，而以目前恒指基本面，點計條數都唔似再要落多幾千點。古天后傾向相信恒指喺26000點會有不俗支持，畢竟呢個係舊年11至12月嘅橫行區，點都應該守一守。
暫時缸邊友最擔心係內地監管沒完沒了，科網股被指壟斷後，又話持有嘅大數據危害國家安全；教育股繼多年前的《送審稿》後，國務院辦公廳上周六又正式印發《關於進一步減輕義務教育階段學生作業負擔和校外培訓負擔的意見》，實施「雙減」，徹底擊殺教育股；到噚日連物管亦被拖埋落水，規管公共空間使用權，就算有關規管對物管股收入影響有限，但投資者已成驚弓之鳥。
內地對多個行業進行監管，長遠係好事，因為內地一向有發展過急嘅弊病，阿爺出手為長遠發展鋪路無可厚非，而對教育企業實行「雙減」，講到底係為咗減輕養孩負擔，其實都係為咗配合三孩政策嘅施。其實投資中資股需要面對政策風除都唔係今時今日先有嘅新鮮事件，熟悉國情都知中資股從都係政策主導。
經濟政策方向莫大於「十四五」。而「十四五」特別強調科技創新、數字經濟，中西方經濟角力重要據點，亦都係人工智能和數字經濟嘅廣泛應用。只要呢個大方向不變，目前相關科網股受監管風暴影響出現大調整，其實係長線投資收集嘅好機會。只係暫時整體氣氛太差，都係等大市回穩，再作定奪。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。