港股二萬四整固 後市仍有機挑戰二萬六
1月17日，大致多雲，早晚清涼，日間部份時間有陽光。美股周五個別發展，道指跌201點；標指跟納指則分別升3點及86點。美股開始步入業績期，大型銀行股打頭陣，不過大型銀行績各異，其中貴為道指大藍籌的龍頭摩根大通，上季在投資銀行和商業銀行業務收入增長力撐下，純利仍按年倒退14.31%至103.99億美元。花旗上季主要靠個人銀行以外的分部錄得收入按年增長18.31%，論地區只有亞洲有增長，按年少賺26.36%至31.73億美元。幾乎畀「股神」巴菲特清倉嘅富國銀行上季在淨利息收入倒退下，整體收入仍按年升12.8%；即使信貸損失撥備按年增加1.52倍，純利仍按年升86.02%至57.5億美元，股價當晚升逾3%。
對於美股後市發展，除咗取決於收水速度之外，就係企業盈利表現，而美企今季業績表現，會有一定指標性影響。而高盛表示今年標指仍會有超過6%回報，並指目前美股跟1999年底科網泡沫有好大分別，理由係標指去年升28.7%，但剔除蘋果公司(Apple Inc.)跟微軟等8大權重股仍升24.9%，反映牛市嘅「廣度」遠超當年，升勢較為全面，提醒如果投資者因擔心估值過高而退出市場，可能會錯失巨額回報。古天后對於美股後市仍有信心，至於通脹威脅雖然將令美股表現反覆，但只要聯儲局收水有序，資金仍會透過投資股市對抗通脹。
至於港股升抵24000水平後，短線需要整固，畢竟市場仍缺乏新資金流入，大市喺資金輪動下，升勢未夠全面，板塊只能輪流炒作。今日焦點當然係之前受續牌困擾嘅濠賭股，有關賭牌續牌細則出台，經行政會完成討論後，修改經營娛樂場幸運博彩的批給數量及批給期限，訂明批給數量最多為六個，並明文禁止轉批給。即係目前嘅經營者，如無意外可繼續經營，而所謂細牌嘅經營者如金沙中國(01928)，之前市場憂慮未獲續牌嘅負面因素可一掃而空。預咗呢個板塊今日會炒起，但裂口高開再高追就似乎唔多值博，反而有貨喺手喺股價急升之際，可以借機會甩身。
港股後市要繼續向上，都係要睇幾隻重磅科技股點行點走，經過上周急升後，ATMXJ有係要時間抖抖，不過只要反彈形態未變，而恒指又已見雙底及升穿頸線，只要企穩24000，並進一步突破24800嘅話，下一步有機會挑戰26000。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。