港股仍乏成交難言轉勢
10月6日，部份時間有陽光，間中有幾陣驟雨，日間天氣仍然炎熱。隔晚美股表現反覆，早段因為債息跟VIX回升，納指曾跌逾2%。早段美股下跌，主要係小非農公布符合預期，小非農新增職位20.8萬份，反映美國職位未有快速萎縮，尤其是9月私人機構薪酬升幅達到7.8%，遠超預期，即係就業市場唔算太差。就業市場仲ok，美聯儲就有條件繼續加息。就連鴿派嘅聯儲官員都話無乜減息空間。呢兩日先有英國彈弓手撤回減稅方案，而澳洲加息幅度少過預期，令市場憧憬美國減息步伐未需要太快，前兩日美股就借機反彈。不過聯儲局政策未有改變，一直係以控制通脹為首要任務，變嘅只係市場情緒。美股反彈至阻力位附近反彈，不過隔晚成交減少，令早段出現回吐，但尾市再有買盤入場，美股跌幅大大縮減。
不過美國薪酬仍然高企，係令企業成本上升嘅原因之一，但喺通脹高企下，成本增加之際，卻面對收入減少，盈利增速放緩甚至倒退，標普企業嘅全年盈利預測增長下調，嚟緊又到美國業績期，一旦美企業績不似預期，交唔到功課，美股或再面臨一波震盪下行。除咗企業盈利不似預期，企業債務係另一個若人關注嘅問題，瑞信近日就傳出流動資金緊掘，或出現債務違約，急需政府出手救亡。事實上，除咗瑞信之外，早有電力公司喺上月向瑞士政府求救，借入40億瑞士法郎以渡過難關，德國政府接管咗幾間天然氣商。目前歐洲嘅能源企業最大鑊，而瑞信嘅問題，亦突顯金融企業亦開始危機初現。歐洲嘅企業債務問題嚴重，雖然美企債務情況未有咁差，但一旦有歐洲大型企業爆企債問題，隨時係引爆市場仆直嘅黑天鵝。
港股噚日大挾淡倉，恒指裂口高開後再升千點收市，重上萬八大關，不過多條移動平均線泰山壓頂，暫時僅收復10日線，港股難言轉勢。雖然噚日成交額重上1055億元，只不過以逾千點升幅嚟計，咁嘅成交都未能配合升勢，只不過係大戶挾爆淡友，暫時未見有新資金流入市場。既然缺水問題仍未解決，港股又邊有條件轉勢，暫時睇睇萬八點能否守得住，守唔住又係陰乾格局，外圍一旦有乜冬瓜豆腐，港股就只有陪跌，再次向下尋底。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。