港股仍未擺脫上落市格局
7月8日，天氣炎熱，部份時間有陽光，有幾陣驟雨。隔晚美股反彈勢頭持續，道指跟標指升逾1%，納指更升逾2%，主要係債息回落，令科技股有反彈機會，納指反彈力度亦強過其餘兩大指數。
原定於周四公布、俗稱「小非農」嘅ADP私人就業職位數據將會暫停至8月底再重新發布，原因係相關機構需要調整研究方法。自疫情爆發以來，「小非農」與美國勞工部所統計嘅非農就業職位長期背道而馳。最誇張係舊年12月，ADP初值80.7萬(修正後77.6萬)，為市場預期值40萬兩倍；而非農初值卻只得19.9萬，只有預期值一半。由於兩項數據偏差太大，令市場人士難以準確判斷及預測勞動力市場變化。
美股走勢更難預測
唔單止勞動市場難以判斷，美股嘅走勢更難預測，雖然目前唔少美企估值已回落至合理甚至吸引水平，但唔代表美股見咗底，又或者依家係大舉入市嘅適當時候。呢一輪美股反彈，主要係商品價格回落，以及商品價格急挫，除咗係通脹有機會見頂之外，另一方面係反映經濟有機會衰退。不過美國步入衰退與否，呢兩個月業績期或者會有較明確指引。
但美股目前嘅單日波幅，反映資金愈炒愈短，市場參與者以極短速度喺唔同板塊之間移動，以速食為主。但當單日波幅不斷擴大，會令長線投資者卻步，甚至迴避，如此一來，市場就會缺乏咗長線資金流入。
港股情況亦如是，雖然目前移動區間大約喺21000至22000之間，1000點移動區問唔算大，但單日可以喺呢個區間之內，行500至800點，單日波幅又係足以嚇怕長線投資者，日升日跌令人無所適從。呢個亦係近日大市就算逐步回升，都唔多見成交配合嘅原因。
而美元強勢，亦令資金從亞洲區市場流出，目前國際資金仍然不斷流入美元，新興市場則不斷錄得資金淨流出，預期喺美國持續收水下，國際資金流向仍然係萬劍歸宗回流美國。如此一來，中港股市本輪嘅反彈，可以持續，扭輔上落市格局，再向上突破，抑或繼續大型區間移動，古天后傾向相信後者，不過一切仍有待觀察，資金流合否隨住美元貨幣政策變化而改變。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。