港股仍未擺脫上落市格局
5月25日，多雲，間中有幾陣驟雨，部份地區有薄霧。隔晚美股走勢繼續反覆，早段市場對科技股及高增長股前景感到憂慮，拖累三大指數下跌，道指一度跌逾400點，其後逐步回穩，收市倒升48點；標指則跌32點；納指收市仍跌270點。
社交媒體Snapchat母公司Snap行政總裁Evan Speigel警告，公司在第2季的收入及經調整後盈利將低於公司預期，同時為咗節省成本，至今年底前將減慢招聘人手。消息拖累公司股價重挫逾四成，其他社交媒體股份亦受壓，Facebook母企Meta急跌7.62%，收報181.28美元；Twitter和Pinterest分別下挫5.52%、23.64%。
值得留意，反映美股整體表現嘅標指，上周曾跌入「技術性熊市」區間，即自高位回調逾20%。景順首席全球市場策略師Kristina Hooper表示，雖然最近3次標指「見熊」後，美國經濟都出現衰退，但此前也有例外，如1987年、1966年及1961年熊市。佢表示因拋售潮已蔓延到財務狀況良好嘅大型企業，反映板塊估值重整「已有些過頭」。佢亦相信聯儲局政策最終不會如市場預期般收緊，投資者可留意科技板塊中嘅投資機遇。
不過唔係個個咁樂觀，亦有分析認為美股早已進入熊市，被譽為「大宗商品之王」、曾經估中2008年商品大跌市的分析員Dennis Gartman，表示任何下跌超過7%嘅股市都屬於熊市，按佢嘅觀點，美股早於年初已步入熊市，並預期呢一輪熊市尚未結束，將會再持續幾個月，投資者應該「逢高沽貨」。
美股處熊市 距底愈來愈近
古天后當然同意美股目前正處於熊市之中，但距離底部似乎愈來愈近，尤其美股近日多次出現單日轉向，V底回彈嘅單日反覆走勢，更加係熊市特色，至於美股幾時見底，古天后就會睇埋下個月，聯儲局正式縮表後，市場流動性有否受影響，若然正式縮表未有對流動性帶嚟重大影響，美股或有望見底。咁見底之後能否急急回升，目前言之尚早，熊市走勢見底後，可以喺低位橫行，收集一段時間，待客觀環境配合，再有資金進場，股市方能見底回升。
不過目前唔少基金嘅現金水平，已去到一個較高水平，同一時間，唔少中型至大型企業，估值已回調到一個合理水平，喺市場不乏等待機會買入嘅資金支持下，資金自然會再次risk on。而美匯指數已從105水平回落至101.75，加上債息有機會見頂，凡此種種都有機會拉動美股從低位回落。
至於中港股市呢邊，美匯指數回落有助人民幣此跌回升，加上阿爺頻頻出招救市，中港股市跌又唔跌得去邊，但缺乏新資金進場下，升又唔升得去邊，就喺現水平反覆，維持日升日跌嘅上落市格局。恒指暫時仍然喺千點之內區間上落，純睇牛熊證嘅重貨區，睇好睇淡嘅玩家旗鼓相當，大戶仍然可以上下其手，雖然只係千點之內嘅波幅，劏牛殺熊亦足以自肥。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。