港股仍處反彈市 逢高減磅執倉等機會
8月24日，部份時間有陽光，間中有一兩陣驟雨，天氣炎熱。美匯略為回軟利好股市，隔晚美股三大指數向上，道指升逾200點；標指則升37點；納指升幅達1.55%，進幅227點，創收市新高。美國聯儲局數據顯示，該局喺周一逆回購操作成交量再次升破1萬億美元大關，達到逾1.136萬億美元，創歷史新高，反映美國持續水浸。
港股噚日反彈，恒指指數一度重上25400點，連日被狠沽嘅科網股普遍做好，只有掀起今次監管風暴嘅阿里巴巴(09988) 斯人獨憔悴，再創上市新低，原因係公司涉嫌洩露用戶數據，加上受業務基地所屬的浙江省政府近日接連有人事變動等消息拖累，股價9連陰再破底，低見151.2元。至於其他科網股雖有反彈，但力度有限，加上港股收市升幅收窄，而成交額不足1700億元，港股咁嘅情況似反彈多過完全見底回升。
其實大市見底與否，好睇ATMX呢啲重磅科技股見底回升，抑或純粹死貓彈。至於喺內地監管步步進逼下，科網企業幾時可以雨過天青，要睇幾個現象。今次科網股揭開殺估值及尋底之旅嘅序幕，由阿里旗下螞蟻上市被刹停而起，解鈴還須繫鈴人，螞蟻能夠重新啟動上市，就係阿里重光嘅一日，亦等於再有重磅科企再成功集資，一日未見螞蟻捲土重來，阿里都係有波幅，冇升幅，其他重磅科企亦然。
另一個指標係ATMX等龍頭止跌回升，走勢形態上回復強勢，至上要重上10日及20日線企穩，先有條件繼續向上。暫時騰訊(00700) 要先企穩448元，並重上456元之上，當然能回補上月底嘅下跌裂口底部489元，先有條件回復強勢。美團(03690) 10日及20日線匯聚區喺215元至217元，即係美團唔上返呢兩條線，短期都難有運行。
而港股要復活嘅另一個，亦係最重要嘅一個條件，係北水重新南來，但暫時北水都係沽多過買，未見返年初以累計逾千億嘅淨買入，睇嚟北水走咗，到呢一刻都未見大舉回流。至於喺上月瘋狂走資嘅外資，亦唔見得走咗會短時間食回頭草，睇返每日大市成交，就知資金一去不復返。而指數方面，恒指至少要重上10日線25823，及20日線26006呢兩個位企穩，先有條件扭轉弱勢。
幾個條件都反映暫時港股係反彈，仲未能扭轉弱勢，所以都係以短線操作為主，低買高沽，而唔係見反彈升市嚟追貨，反而係吼急跌撈貨，勝算較高，今日大市反彈，睇嚟又係執倉減貨嘅好機會。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。