港股仍處於上落市格局
6月17日，大致多雲，有幾陣驟雨，日間部份時間有陽光，天氣炎熱。隔晚美股顯著下跌，三個主要指數跌穿今年低位，道指跌741點；標指跌123點；納指更跌逾4%，跌453點。美國上周首次申領失業教濟人數減少3000人，至22.9萬人，多過市場預期的21.8萬人；截至前周止持續申領人數則減少3000人，至131.2萬人，同樣多過預期的130.7萬人。5月新屋動工數目以年率計按月跌14.4%，至154.9萬伙，遠低過市場期的169.3萬伙；建築許可亦跌7%，至以年率計169.5萬伙，同樣差過預期。兩指數據均反映經水經濟情況似乎不妙。
一直係好友嘅瑞銀都開始轉口風，將今年標指最新目標下調至3900點，隨住聯儲局更加重視對抗通脹，經濟活動面臨風險正在上升。由於債券孳息率上升、信貸利差擴大及股市下跌，金融環境收緊可能會對經濟造成壓力。事實上，喺通脹高企，債息無奈亦高居不下，美股亦只有繼續尋底。
古天后一直最擔心滯漲出現，以目前美國嘅經濟情況，似乎已愈嚟愈似步向滯漲局面，對上一次美國滯漲要數到70年代，打緊越戰嘅候，當年情況同家下有幾分相似，包括能源價格急升，糧食危機乍現，快速拉升CPI，咁聯儲局就要靠大加息嚟壓抑通脹。當息口高企，咁被視為無風險資產嘅美債將會變得更吸引，尤其股票喺收益率跟債息收益率愈收愈窄，咁投資者又點會願意冒險。
至於港股呢邊，繼續夾喺美股跟內地股市之間，美股嘅弱勢拖住港股後腿，但同時阿爺又想盡辦法，不斷出招救市。較早前阿爺出指令，下半年所有專項債要提前喺6月底前完成，為了應付龐大資金需求，5月M2急增至11.5%，係去年5月以來最高。地方政府多咗錢，近日A股亦有回暖跡象，不過呢啲熱錢，本來係用作投放於基建之用，即係就算有錢流入A股，甚至透過互聯互通流入港股，都有機會hit and run，隨時由股市流走。一旦呢啲熱錢流走，中港兩地股市喺無資金支撐下，加上美股又食咗瀉藥咁款，亦只有跟隨大圍回落。港股暫時仍處於上落市局面，移動區間仍然係20000至22000左右，大戶舞高弄低，好淡通殺。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。