11月28日，天晴，日間天氣乾燥。雖然感恩節Black Friday嘅銷售數據差過預期，但美股又唔算好大，牛皮偏軟，仍然高位整固。標指從4300水平一口氣回升至4550水平，於4600水平前阻力較大，短期整固一下亦好正常。市場開始較炒較落後嘅零售股，尤其網購已成風，平台股如Shopify喺11月份急升了60%，炒味極濃。
重磅科技股有買貴，無買錯，微軟新高再新高，預估PE37倍，但照樣破頂，港股呢邊嘅ATMJ完全無得比，呢個係中港股市資金面薄弱，美股流動性極佳嘅差別。明年美國大選年，留意Facebook母企META跟Google都會受惠於選舉廣告開支急增，明年有望破頂。美股升到呢啲水平，三四線股份股開始抬頭，重磅股抖氣。不過VIX跌至12.7，美股淡友被打至無力還手，情況跟港股好友完全乏力還擊剛好相反。美股11月急升正正係美股大挾淡倉，空軍投降。不過債市空軍尚未完全撤退，但市場普遍相信息口已見頂，更多人睇明年減息1%，2025年再減1%，如此推算2025年息率將回落至3.25%，目前10年息仍有4.4%，已經係好好嘅投資工具。美國債台高築，只有不斷以債冚債，當通脹消退，最終都係要靠QE呢劑糖衣毒藥。
美國再加息機會不大，美元開始走弱，資金流向新興市場尋找機會。美匯回升至105期間，人民幣受壓跌至7.37水平，當美元轉弱，人民幣從7.37反彈至7.15，作為全球第2大經濟體系，人民幣上升應該吸引全球熱錢買入人民幣資產才對，但從中港股市嘅成交嚟睇，完全未見熱錢流入，中概股仍然係一潭死水。
港股以估值計算，已跌至甚具吸引力水平，確有資金喺17000水平儲貨，但高追免問。資金都只係跟住消息短炒，好似內房股炒白名單，但名單未見公布，內房股即見回吐，游資只透過消息短炒，完全無心持貨，以至港股稍為彈高，即遇獲利沽壓。
港股自去年外資開始大舉徹退，雖然至去年第四季見有資金再度抄底，但持貨一季後，今年3月再度流出，但至現水平外資沽貨都沽得八八又九，沽壓已至尾聲，但買盤不足，形成低位拉鋸，內地股市自顧不下，北水間中入場港股短炒，但難寄望北水可以救港股，形成目前半死不生狀態。A股今日不回升，港股難有運行，恒指噚日低位17358不容有失，呢個位剛好係短期上升軌所在，失守再度下試17000關，即市反彈阻力為上兩個交易日高位17677及17772，睇嚟要過埋明日期指結算，方見真章。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。