港股借中概審計消息反彈無奈遇上美股插水
8月29日，大致多雲，有幾陣驟雨，局部地區有雷暴。美股上周五急跌，鮑爺放鷹，道指上周五跌1008點；標指跟納指分別跌141點及497點。鮑爺上周五喺Jackson Hole會議大肆放鷹，強調穩定價格係聯儲局責任，同時亦係經濟基石。佢老人家話更高嘅利率，雖然會令為大家帶嚟痛苦，並令到經濟增長放緩及勞市場轉弱，但有助降低通脹，為咗降低通脹，都只有付出痛苦嘅代債，因為價格唔能夠恢復穩定，只會帶嚟更大痛苦。
之前古天后都講咗，雖然通脹似見頂，但仍然keep住喺高位，仍遠遠高於聯儲局嘅目標，市場憧憬聯儲局暫緩加息，甚至打賭明年減息，完全係過份樂觀。加上近兩個星期，美股開始雞犬皆升，炒到啲四五六線股仔，已經叫大家提高警覺，音樂椅遊戲嘅音樂隨時停落嚟，結果上周美股就出現大逆轉，資金明顯由risk on轉返去risk off。當美匯指數再度回升，資金再流入美元，眼見虛擬貨幣反彈見頂又回落，美股亦隨之向下。而強美元對新興市場嚟講，帶嚟更大壓力，美股腳軟，其他新興市場表現只有更差。
港股都好難再下一城
中美雙方達成審計協議，中概股會計底稿可存於香港，美方有權喺香港查帳，消息流出，中概股急升，夜期也一度急升500點至20700水平，但撞正美股插水大跌，港股ADR急升後回落至20158收市，較港股收市微跌12點。而黑期更重返20000水平，估計喺明日期指結算下，港股今日或於20000水平爭持。
雖然港股想借中概股審計達成協議嘅消息挾返高啲，而上周四半日市，就借頭借路挾上，淡友喺上周三一度狠沽至19200水平，但又未見再有沽盤追沽，大戶就只有平淡倉反手挾上。不過整體成交僅得周四半個交易日叫做有啲睇頭，喺成交薄弱下，再加上美股腳軟，港股都好難再下一城。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。