9月26日，大致天晴，但局部地區有驟雨，下午天氣酷熱。再有聯儲局委員放鷹，指或有需要進一步加息，10年債息衝破4.5%，美股早段低開，但標指跌至4300水平又頂住，三大指數倒升收市，道指升43點，標指升17點，納指則升59點。美股近日被多重利淡消息圍繞，包括聯儲局放鷹，車廠大罷工，以及美國政府再次面臨停擺，對沖基金7月被挾被逼平淡倉後，9月再度加碼做淡，連續三個星期沽空美股，VIX指數一度升破17水平，不過美股尾市倒升，VIX重返16.9，暫時留意住標指4300呢個大支持位守唔守得住，暫時美股仍然屬於高位震盪。
市場上好淡雙方主要就美國經濟情況似惡化進行辯論，聯位空缺減少，失業率見底回升至3.8%，加上上半年支撐美股向上嘅主要因素，AI熱潮正減退，就連股王Navidia都由502高位回調兩成至400美元水平，反映AI熱潮已過去，市場唔會願意高追。只會候低吸納，畢竟美股估值唔係平。
至於港股呢邊，噚日大市回吐逾300點，雖然夜期跟ADR有些微反彈，但力度有限，加上道指期貨回軟，港股今日都唔會好得去邊。中美貨幣政策背道而馳，美國聯儲局對未來利率預期偏鷹，而人行卻持續採取寬鬆立場，以刺激經濟，呢個情況此情令中美息差持續擴闊。美元強、人民幣弱，噚日離岸人民幣下跌超過100個點子，重回7.3關之上，利淡中港股市。
阿爺持續出招，可惜都係用口水救市，A股喺無新資金投入之餘，亦未能阻止主要沽東或外資沽貨。A股向來都係上市後玩完，上市只係大股東搵出口套現，公司集資後，並未有為小股東創造更大價值，尤其係所謂新經濟股，呢種文化更開始蔓延至港股。商湯(00020)正正係一個說明公司蝕錢，由股民埋單嘅好例子，否則亦唔會有韭菜論，小股民淪為大股東韭菜， 再三被割，一個咁嘅市場，基本只有趕客，長遠難以健康發展。
至於港股近年只淪為大戶炒作指數嘅賭場，操控住重磅指數股，舞高弄低指數從中圖利，北水亦係彈出彈入，只進行短線操作，長線基金撤離後，完全無再入場意圖。短線走勢嚟講，周五起北水休假，雖然有個季結因素，但港股自1月見咗高位後，拾級而下，基本做唔做粉飾櫥窗意義已不大。留意港股上周五反彈至18000水平，噚日再度回復弱勢，幾乎抹去上周五全部升幅，港股弱勢持續，即使有所謂嘅利好息挾淡倉，喺無成交配合下，挾一挾淡友又打回原形。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。