11月2日，大致天晴，日間乾燥。隔晚聯儲局議息，一如預期唔加息，而鮑爺無再放鷹，只不過佢老人家強調咗「目前完全沒考慮降息」，此等言論表現佢未有放鴿，但目前唔減息，唔等於之後唔會減，只係要繼續壓抑通脹，鮑爺當然唔會咁輕易放鴿。雖然唔減息住，但利率期貨顯示，12月加息機會進一步下降，美股三大指數上升，道指升221點；標指跟納指分別升44點及210點，息好敏感股做好。標指圱上4200，但目前美股估值仍偏高，市場唔願高追，不過空軍已逐步撤退，能守住呢啲位，美股喺年結12月會做返好少少。
美國第三季 GDP出現強勁增長，除咗係上半年股市做好，帶來財富效應，更多人願意喺暑假期間出外消費，帶動起酒店和餐飲，但呢個季節性因素，會隨住9月返開學而減退，估計第四季難再有4.9%高速增長，可能會回落至3%以下。至於小非農新增職位降至11.3萬人，遠低於預期15萬。過息口高企，令缺人行業如酒店及餐飲，開始減少招聘，職位空缺少於千萬份，工作減少令更多美國人唔敢太頻密轉換工作，就業人數喺未來數月會進入低增長期。
另一項數據係工資增長，轉工工資增速降至8.4%，年初時係講緊10%以上，而平均時薪加幅亦放緩至5.7%，為24個月來最低。工資增速係最直接推高物價，一旦民眾收入減少，自然就削減開支，需求減少令企業放緩擴充速度，未來就業市場將逐步放緩。小非農主要反映私人招聘市場，週五大非農數字包含更多政府招聘，但喺美國財赤擴大之際，職位招聘正縮減中，政府考慮如何削減開支，而唔係花更多錢請人。
噚日港股表現牛皮，順利過渡隔晚議息後，暫時未有利淡消息，月中習拜會係好友反攻藉口，今日如能守穩10日線，17200水平企穩，收市能高於周二高位17338，有望扭轉過去多月弱勢，展開一個較大反彈浪。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。